सामुहिक कृषि खेतिमा प्रोत्साहन, खिजिदेम्बाका १५ कृषक समूहलाई उपकरण वितरण

जेठ १४, सोलुखुम्बु । अर्गानिक खिजीदेम्बा गाउँपालिकाले सामुहिक कृषि खेतीलाई प्रोत्साहन गर्ने उद्देश्यले पालिकामा दर्ता भएका १५ कृषक समूहलाई विभिन्न कृषि सामग्री तथा उपकरण वितरण गरेको छ । आधुनिक कृषि प्रणालीमा आधारित उत्पादन वृद्धि र कृषकहरूको आम्दानीमा सुधार ल्याउने उद्देश्यसहित यो कार्यक्रम सञ्चालन गरिएको हो ।

गाउँपालिकाका अध्यक्ष गम्बु शेर्पाले सामुहिक खेती मार्फत स्थानीय उत्पादनमा वृद्धि ल्याउन सकिने विश्वास व्यक्त गर्दै सामुहिक खेतीले थोरै लगानीमा धेरै उत्पादन गर्न सकिने सम्भावना राख्ने बताउनुभयो । यसको लागि आवश्यक उपकरण तथा प्राविधिक सहयोग दिन गाउँपालिका सधैं तयार रहेको उहाँको भनाई छ । गाउँपालिकाको प्रावधान अनुसार सामुहिक खेती गर्नका लागि कम्तीमा २ सय रोपनी खेतीयोग्य जमिन आवश्यक पर्नेछ ।

इच्छुक कृषक समूहले पालिकामा सामुहिक कृषि फारम दर्ता गराएर अनुदान स्वरूप उपकरण तथा सामग्री पाउने भएका छन् । यो अभियान अन्तर्गत कृषकहरूलाई ट्रयाक्टर, हल जोत्ने यन्त्र, मलखाद, बीउबिजन तथा सिँचाइ उपकरणहरू प्रदान गरिएको छ । अध्यक्ष शेर्पाले आधुनिक प्रविधिमा आधारित कृषि प्रणालीलाई जोड दिँदै स्थानीय उत्पादनले आयात प्रतिस्थापनमा समेत योगदान पु‍र्याउने बताउनुभयो ।

सामुहिक खेतीको अवधारणाले कृषकहरूलाई सहकार्य र सञ्जाल निर्माणको अवसर प्रदान गर्नुका साथै युवालाई कृषि क्षेत्रमा आकर्षित गर्ने अपेक्षा गरिएको छ । गाउँपालिकाले आगामी वर्षहरूमा थप कृषक समूहहरूलाई समेट्ने योजना बनाएको जनाएको छ ।