१ दशमल ८ मिलियन डलर खुम्बु क्षेत्रको शिक्षा र स्वास्थ्यमा लगानी गर्छौँ : न्युजिल्याण्ड उपप्रधानमन्त्रि पिटर्स

जेठ १५, सोलुखुम्बु । न्युजिल्याण्डका उपप्रधान एवं परराष्ट्रमन्त्रि विन्स्टन पिटर्सले खुम्बु क्षेत्रको शिक्षा र स्वास्थ्यमा आगामि ५ बर्षका लागि १ दशमल ८ मिलियन डलर खर्च गर्ने बताएका छन् । मे २९ अर्थात ७२ औँ सगरमाथा दिवसको अवसरमा खुम्जुङ माध्यामिक विद्यलायमा आयोजित कार्यक्रमलाई सम्बोधन गर्दै उप प्रधानमन्त्रि पिटर्सले नेपालको हिमाली क्षेत्रसँग न्युजिल्याण्डको सम्बन्धको चर्चा गर्दै हिमालयन ट्रष्ट मार्फत यहाँको स्वास्थ्य र शिक्षामा लगानि र सहयोग जारी राख्ने प्रतिबद्धता ब्यक्त गरे ।
उनले नेपाल र हिमाली क्षेत्रमा न्युजिल्याण्ड सरकाले सहयोग गरिरहने भन्दै आज भन्दा ७२ बर्ष अगाडी न्युजिल्याण्डका नागरिक सर एडमण्ड हिलारी र नेपाली तेन्जिङनोर्गे शेर्पाले सगरमाथाको सफल आरोहण गरेर विश्वमै ठूलो उपलब्धि हाँसिल भएको स्मरण गरे । सगरमाथा आरोहणको ७२ बर्ष पुगेको दिनको सम्झनामा खुम्बु क्षेत्रमा सगरमाथा दिवस मनाउन खुम्जुङ पुगेका उपप्रधानमन्त्रि पिटर्सरलाई खुम्बु पासाङल्हमु गाउँपालिका अध्यक्ष मिङ्मा शेर्पा र स्थानीयले स्वागत गरेका थिए ।

       सो क्रममा पालिका अध्यक्ष शेर्पाले न्युजिल्याण्ड सरकारको शिक्षा क्षेत्रमा भएको निरन्तर सहयोगले खुम्बु क्षेत्रमा दक्ष जनशक्ति उत्पादन र शिक्षाको समग्र गुणस्तरमा ठूलो मद्दत भएको भन्दै आगामि दिनमा जलबायु अनुकुलनका कार्यक्रममा सहयोग गर्न माग गरे । अध्यक्ष शेर्पाले जलबायु परिवर्तनको असरका कारण खुम्बु क्षेत्रमा ठूला प्राकृतिक विपत्तिहरु आईपरेको भन्दै यसको अनुकुलनका कार्यक्रम संचालन गर्न माग गरेका छन् ।

             स्थानीय अगुवाहरुले न्युजिल्याण्ड सरकारको सहयोगको मुक्तकण्ठले प्रशंसा गरेका छन् । सगरमाथा दिवसको अवसरमा खुम्बु क्षेत्रमा खेलकुद, मनोरन्जन र आरोही सम्मान जस्ता कार्यक्रम संचालन भईरहेको पालिका अध्यक्ष शेर्पाले जानकारी दिए ।