सोलुदुधकुण्ड १० टाप्टिङको सार्वजनिक सुनुवाई : ७० प्रतिशत भौतिक प्रगति

जेठ १६, सोलुखुम्बु । सोलुदुधकुण्ड नगरपालिका वडा नम्बर १० टाप्टिङको चाल आर्थिक बर्षको हालसम्मको भौतिक प्रगति ७० प्रतिशत भएको छ । ओङछु मेमोरियल अस्पतालको प्रांगणमा भएको चालु आर्थिक बर्षको सार्वजनिक सुनुवाई कार्यक्रममा वडा अध्यक्ष होमबहादुर मगरले उक्त प्रगति विवरण सार्वजनिक गर्नु भएको हो ।
नगर प्रमुख नाम्गेलजाङ्बु शेर्पाको प्रमुख आतिथ्यता तथा रेडियो एभरेष्टको सहजिकरणमा भएको सार्वजनिक सुनुवाईका क्रममा वडा अध्यक्ष मगरले वडा, नगरपालिका, प्रदेश र संघिय सरकारको समेत गरि चालु आर्थिक बर्षमा वडा भरिमा ३ करोड १६ लाख ३० हजार रुपैँया बराबरको बजेट कार्यान्वयन भईरहेको र जस मध्ये ७० प्रतिशत काम भईसकेको र बाँकी ३० प्रतिशतको योजना तथा कार्यक्रमहरु अन्तिम चरणमा पुगेको बताउनु भयो ।
जनताले उठाएको प्रश्नको जबाफ दिँदै नगर प्रमुख नाम्गेल जाङ्बु शेर्पाले आफ्नो नेतृत्वमा विकट वडाको पहिचान रहेको १० नम्बर वडाको मुहार फेर्न अधिक बजेट लगानी गरेको भन्दै स्वास्थ्य, शिक्षा र सडकको विस्तारमा उल्लेख्य प्रगति भएको बताउनु भयो । वहाँले विकासमा आस्थाको आधारमा विभेद नगरिएको भन्दै आगामि आर्थिक बर्षको योजनामा पनि यस क्षेत्रलाई प्राथमिक्तामा राख्ने नगरप्रमुखको प्रतिबद्धता छ । त्यस्तै उठेका प्रश्नको जबाफ दिने क्रममा वडा अध्यक्ष मगरले आफुले तिनै तहका सरकारसँग उच्चतम समन्वय गरेर योजना ल्याई पारदर्शी रुपमा परिचालन गरिरहेको बताउनु भयो ।

          रेडियो एभरेष्टका पत्रकार भानुभक्त निरौलाले सहिजकरण गर्नु भएको कार्यक्रममा वडा सचिव रामहरी चौलागाईले हालसम्मको सेवा प्रवाह र आन्तरिक राजश्य संकलनको विवरण प्रस्तुत गर्नु भयो । कार्यक्रममा सहभागिहरुले वडाको हालसम्मको काम सन्तोषजनक रहेको भन्दै आवधिक रुपमा वडाको नेतृत्व टोलटोलमा पुगेर जनताको राय लिनु पर्ने सुझाब दिएका छन् ।