कोशी लोकमार्गअन्तर्गत धरान–धनकुटा सडक खण्ड अवरुद्ध

जेठ १७, सोलुखुम्बु । कोशी लोकमार्गको धरान–धनकुटा सडकखण्ड अवरुद्ध भएको छ । आज बिहान परेको पानीले सडक बगाएपछि कोशी लोकमार्गको धरान–धनकुटा सडक बन्द भएको हो । साँगुरीगढी गाउँपालिका–६ फेदी लेउती खोलामा आएको बाढीले झन्डै एक सय मीटर सडक कटान गरेपछि दुवैतर्फको सडक पूर्णरुपमा अवरुद्ध भएको जिल्ला प्रहरी कार्यालय धनकुटाका निमित्त सूचना अधिकारी ध्रुवनारायण श्रेष्ठले जानकारी दिनुभयो ।

धरान, धनकुटा, भोजपुर, सङ्खुवासभा, तेह्रथुम जोड्ने सडक पूर्णरुपमा अवरुद्ध भएको छ । त्यस्तै कोशी लोकमार्गको साँगुरीगढी गाउँपालिका–६ नमस्ते झरना नजिक रुख ढल्दा सडक अवरुद्ध छ । यस्तै तमोर करिडोर अन्तरगत चौबिसे गाउँपालिका–४ छरुवा खोलामा आएको बढीले निर्माणाधिन सडक बगाउँदा यो सडकखण्ड पनि अवरुद्ध छ । अवरोध भएका सडकलाई खुलाउने प्रयास भइरहेको छ ।