ओखलढुङ्गाबाट दुई सय ११ वटा भ्रष्टाचार उजुरी : चम्पादेवी गाउँपालिकामा सबैभन्दा बढी

जेठ १८, सोलुखुम्बु । ‘भ्रष्टाचार नियन्त्रण तथा सुशासन प्रवद्र्धन’ अभियान अन्तर्गत ओखलढुङ्गा पुगेको अख्तियार दुरुपयोग अनुसन्धान आयोगको टोलीले जिल्लाबाट परेका २११ वटा भ्रष्टाचार उजुरीको तथ्याङ्क सार्वजनिक गरेको छ । आयोगको केन्द्रीय कार्यालयका प्रवक्ता एवं सहसचिव राजेन्द्रकुमार पौडेलका अनुसार चालु आर्थिक वर्षमा आयोगको केन्द्रीय कार्यालयमा मात्र ओखलढुङ्गाबाट १३ वटा संघीय, १२ वटा प्रदेश र ९९ वटा स्थानीय तहसँग सम्बन्धित गरी १२४ वटा उजुरी परेका छन्।

तीमध्ये संघका ६, प्रदेशका ५ र स्थानीय तहका ६९ उजुरी गरी जम्मा ८० वटा उजुरी फछ्र्यौट भएको जनाइएको छ । त्यस्तै, आयोगको बर्दिवासस्थित क्षेत्रीय कार्यालयमा ओखलढुङ्गाबाट ८७ वटा उजुरी परेका छन् । बर्दिवास कार्यालयका उपसचिव पौडेलका अनुसार तीमध्ये ५० उजुरी फछ्र्यौट भएका छन् भने ३७ वटा कारबाहीको प्रक्रियामा छन् । स्थानीय तह अनुसार सबैभन्दा बढी उजुरी चम्पादेवी गाउँपालिकाबाट परेका छन् ।

उक्त गाउँपालिकाबाट १७ उजुरी परेकामा १४ फछ्र्यौट भइसकेका छन् भने ३ उजुरी बाँकी छन् । चिशङ्खुगढी गाउँपालिकाबाट १४ उजुरी परेका छन्, जसमा सात फछ्र्यौट भइसकेका छन् र सात अझै बाँकी छन् । मानेभन्ज्याङ गाउँपालिकाबाट ११ उजुरीमध्ये ९ फछ्र्यौट भएका छन् भने दुई उजुरी अझै बाँकी छन्। सिद्धिचरण नगरपालिकाबाट १० उजुरी परेकामा तीन फछ्र्यौट र सात बाँकी, मोलुङ गाउँपालिकाबाट ९ उजुरी परेका छन्, जसमा छ फछ्र्यौट र तीन बाँकी छन् ।

लिखु र सुनकोशी गाउँपालिकाबाट समान ५–५ वटा उजुरी परेका छन् । लिखुका तीन र सुनकोशीका दुई उजुरी फछ्र्यौट भइसकेका छन् भने बाँकी उजुरीहरू अध्ययन तथा कारबाहीको प्रक्रियामा रहेको अख्तियारले जनाएको छ । आयोगका अनुसार उजुरीहरूको संख्या स्थानीय तहमा सुशासन, पारदर्शिता तथा उत्तरदायित्व अभिवृद्धिको आवश्यकता रहेको संकेत हो । आयोगले यस्ता उजुरीहरूको निष्पक्ष छानबिन गर्दै भ्रष्टाचार नियन्त्रणमा जोड दिएको जनाएको छ ।