सोलुखुम्बुमा वडा स्तरका जनप्रतिनिधिहरूका लागि समावेशी योजना तर्जुमा सम्बन्धी तालिम

जेठ १८, सोलुखुम्बु । सोलुखुम्बु जिल्लामा वडा स्तरका जनप्रतिनिधिहरूका लागि समावेशी र सहभागीता मुलक योजना तर्जुमा सम्बन्धी तालिम सुरु गरिएको छ । प्रदेश अनुसन्धान तथा प्रशिक्षण प्रतिष्ठान, झापाको आयोजनामा सञ्चालित दुईदिने तालिम आइतबारदेखि सुरु भएको हो । तालिमको उद्घाटन जिल्ला समन्वय समितिकी उपप्रमुख टिका माया मगरको प्रमुख आतिथ्यता र प्रदेश तथा स्थानीय सरकार सवलीकरण कार्यक्रमका संयोजक जनार्दन कटेलको अध्यक्षतामा सम्पन्न भएको हो ।

तालिममा खुम्बु पासाङल्हामु गाउँपालिका र लिखुपिके गाउँपालिका बाहेकका अन्य स्थानीय तहका ३० जना वडा अध्यक्षहरूको सक्रिय सहभागिता रहेको थियो । तालिममा विकास योजनामा समावेशीता र सहभागीता, संघीय संरचनामा स्थानीय तहको योजना तर्जुमा प्रक्रिया, स्थानीय तहका अधिकार तथा कार्यक्षेत्र, र वडा समितिको भूमिका सम्बन्धी विविध विषयमा जानकारी दिइएको थियो । त्यसैगरी, योजना छानोट, प्राथमिकता निर्धारण, बजेट तथा कार्यक्रम तर्जुमा, सुशासन, सामाजिक उत्तरदायित्व, लैङ्गिक समानता र समावेशीकरणका साथै अनुगमन, मूल्याङ्कन र भुक्तानी प्रक्रियाको बारेमा समेत विस्तृत छलफल गरिएको थियो ।

उक्त तालिमको विजया राजवैद्य र सिर्जना शाक्यले सहजीकरण गरिरहनुभएको छ । सहभागी वडा अध्यक्षहरूले तालिमलाई अत्यन्त उपयोगी र प्रभावकारी भएको प्रतिक्रिया दिएका छन् । उक्त तालिमले स्थानीय तहमा योजना निर्माणमा थप स्पष्टता र प्रभावकारिता ल्याउने अपेक्षा गरिएको छ ।