सोलुखुम्बुमा चितुवाको आतंक : कृषक सतर्क रहनु आवश्यक

जेठ १८, सोलुखुम्बु । सोलुखुम्बुको सोलुदुधकुण्ड नगरपालिका–४ स्थित खुम्बिला एग्रो फार्ममा चितुवाको आक्रमण फेरि एक पटक चर्चाको विषय बनेको छ । गएराति भएको घटनामा चितुवाले झण्डै दुई सयवटा कालिज पालिएको फार्ममा पसेर ठूलो संख्यामा कालिज मारेपछि स्थानीयवासी त्रसित बनेका छन् ।

विकास बराईलीद्वारा सञ्चालित खुम्बिला एग्रो फार्ममा करिब ५५ रोपनी क्षेत्रफलमा झण्डै एक करोड रुपैयाँभन्दा बढी लगानीमा कालिज पालन हुँदै आएको छ । बराईलीले झण्डै दुई वर्षदेखि संचालन गर्दै आएको यस फार्ममा यसअघि पनि चितुवाको आक्रमण भइसकेको थियो। । उनका अनुसार विगतका वर्षहरूमा चितुवाले १५ वटा बाख्रा र गाईका बाच्छा समेत मारिसकेको छ । पुनः चितुवाको आक्रमणबाट ठूलो संख्यामा भएको क्षतिपछि पीडित कृषक बराईलीले सम्बन्धित निकायसँग उचित क्षतिपूर्तिको माग गरेका छन् ।

यस सन्दर्भमा डिभिजन वन कार्यालय सोलुखुम्बुका प्रमुख रामजी शाहले कृषकहरूले दर्ता गराएका क्षतिको मूल्यांकन गरी क्षतिपूर्तिको प्रक्रिया अगाडि बढाइने जानकारी दिनुभयो । घटनापछि प्रमुख जिल्ला अधिकारी अनोज कुमार घिमिरे स्वयं घटनास्थलमा पुगेर अनुगमन गर्नुका साथै नियन्त्रणमा लिइएको चितुवालाई सुरक्षित ठाउँमा पठाइने व्यवस्था मिलाइने बताएका छन् । चितुवाको बारम्बार आक्रमणका कारण सोलुदुधकुण्ड क्षेत्रका कृषकहरू डर र त्रासमा बाँच्न बाध्य छन् ।