खुम्बु क्षेत्रमा जापानी प्रशिक्षकद्वारा जुडो खेल तालिम, जिल्ला खेलकुद विकास समितिबाट स्वागत तथा बिदाई

जेठ १८, सोलुखुम्बु । लामो समयदेखि सोलुखुम्बुको खुम्बु क्षेत्रमा क्रियाशील जापानीज जुको संस्थाले विद्यार्थीहरूलाई जुडो खेलतर्फ आकर्षित गर्दै प्रशिक्षित खेलाडी उत्पादनमा योगदान पुर्‍याउँदै आएको छ । यसैक्रममा, यस वर्ष जापानबाट प्रशिक्षक यामी मासुमन्नो तीन महिनाका लागि नेपाल आएका थिए । उनले खुम्बु क्षेत्रका सम्पूर्ण प्रशिक्षकहरूलाई थप सशक्त बनाउन विशेष तालिम प्रदान गरेका थिए ।

तालिम सम्पन्न गरी स्वदेश फर्किने क्रममा जिल्ला खेलकुद विकास समिति सोलुखुम्बुले एक कार्यक्रमका बीच उहाँलाई औपचारिक रुपमा स्वागत तथा बिदाई गरेको छ । जिल्ला खेलकुद विकास समिति सोलुखुम्बुका अध्यक्ष नरेन्द्र थापा मगरका अनुसार, “जुको संस्थाको निरन्तर सहयोगले स्थानीय बालबालिका तथा किशोरकिशोरीहरू जुडो खेलमा प्रोत्साहित भएका छन् । स्थानीयस्तरमै अन्तर्राष्ट्रिय स्तरका प्रशिक्षकबाट तालिम पाउनु सोलुखुम्बुका लागि गौरवको कुरा हो ।” अध्यक्ष मगरले बताउनुभयो।

खेलकुदको माध्यमबाट युवा वर्गलाई अनुशासन, आत्मरक्षा र नेतृत्वमा प्रशिक्षित गर्न सकिने हुँदा यस्ता तालिमहरू भविष्यमा पनि निरन्तर चलाउने प्रतिबद्धता समेत समितिले जनाएको छ । जुडो सङ्घको जिल्ला अध्यक्ष पासाङ तेम्बा शेर्पाले उहाँहरुलाई उपस्थित गराउनु भएको थियो ।