सङ्खुवासभाको पिलुवा खोलामा पौडी खेल्ने क्रममा डुबेर एक बालिकाको मृत्यु

जेठ २१, सोलुखुम्बु । सङ्खुवासभा जिल्लाको मादी नगरपालिका–९ फाविङस्थित पिलुवा खोलामा पौडी खेल्ने क्रममा एक बालिकाको मृत्यु भएको छ भने अर्की गम्भीर घाइते भएकी छन्। आज बिहान करिब साढे ९ बजे पौडी खेल्ने क्रममा पाँचखपन नगरपालिका–९ घर भई हाल चैनपुर नगरपालिका–२ नुनढाकी बस्दै आएकी अन्दाजी १३ वर्षीया समिक्षा लिम्बूको डुबेर मृत्यु भएको जिल्ला प्रहरी कार्यालय सङ्खुवासभाका प्रहरी निरीक्षक अभिषेक श्रेष्ठले जानकारी दिएका छन्।

सोही क्रममा चैनपुर–२ की १३ वर्षीया दिक्षा राई गम्भीर घाइते भएकी छन्। उनलाई तत्कालै उद्धार गरी प्राथमिक स्वास्थ्य केन्द्र चैनपुरमा उपचारका लागि लगिएको प्रहरीले जनाएको छ। घटनाको खबर पाउनेबित्तिकै इलाका प्रहरी कार्यालय चैनपुरका प्रहरी निरीक्षक देउप्रसाद लिम्बूको नेतृत्वमा प्रहरी टोली घटनास्थलतर्फ खटिएको छ।

प्रहरी स्रोतका अनुसार घटनाको थप अनुसन्धान भइरहेको छ। स्थानीय प्रशासनले गर्मी मौसममा जलाशय तथा खोलानालामा पौडी खेल्दा सावधानी अपनाउन अभिभावक र बालबालिकालाई आग्रह गरेको छ।