जातीय छुवाछूत तथा सामाजिक भेदभाव विरुद्ध ताप्लीमा सचेतनामूलक कार्यक्रम

जेठ २१, सोलुखुम्बु । “दलित–गैरदलितबीच हुने सामाजिक अवरोध विरुद्ध ताप्लीबासी उठौँ, जातीय विभेद र छुवाछूत अन्त्य गर्न सबै मिलि अघि बढौँ“ भन्ने मूल नाराका साथ ताप्ली गाउँपालिकामा जातीय छुवाछूत तथा सामाजिक भेदभावविरुद्ध सचेतनामूलक कार्यक्रम सम्पन्न भएको छ । संयुक्त राष्ट्र संघले २१ मार्च १९६५ मा सबै किसिमका जातीय भेदभाव अन्त्य गर्न अन्तर्राष्ट्रिय महासन्धि जारी गरेको सन्दर्भमा हरेक वर्ष २१ मार्चलाई ‘अन्तर्राष्ट्रिय जातीय भेदभाव उन्मूलन दिवस’का रूपमा मनाइँदै आएको छ ।

सोही अवसरमा ताप्ली गाउँपालिकामा दलित समाज विकास सञ्जालको आयोजनामा भव्य कार्यक्रम सम्पन्न गरिएको हो । कार्यक्रमको प्रमुख अतिथि गाउँपालिका अध्यक्ष ढुङ्गराज विश्वकर्मा, विशिष्ट अतिथि उपाध्यक्ष धनमाया मगर, प्रमुख प्रशासकीय अधिकृत मनोज कुमार मगर, पाँचै वडाका वडाध्यक्ष, कार्यपालिका सदस्य, राजनीतिक दल, शिक्षक प्रतिनिधि, विभिन्न जातीय संघसंस्था, तथा अन्य सरोकारवालाहरूको उपस्थिति रहेको थियो । कार्यक्रमको उद्घाटन महेन्द्र रत्न मावि रुपाटारको प्राङ्गणबाट पञ्चेबाजासहित “दलित र गैरदलितबीचको विभेद अन्त्य गरौँ“, “राष्ट्रिय दलित एकता सफल पारौँ“, “छुवाछूत र जातीय विभेद गर्नु जघन्य सामाजिक अपराध हो“ भन्ने नारा लेखिएका प्लेकार्ड र ब्यानरसहित ¥याली निकालिएको थियो ।

र्याली गाउँपालिका भवन हुँदै पुनः विद्यालय परिसरमा पुगेर औपचारिक कार्यक्रममा परिणत भएको थियो । कार्यक्रममा मन्तव्य दिने अधिकांश वक्ताहरूले दलित र गैरदलितबीच अझै पनि तल्लो तहमा जातीय भेदभाव व्याप्त रहेको भन्दै यसलाई अन्त्य गर्न नीति–नियम मात्र होइन, व्यवहारिक रूपान्तरण जरुरी भएको उल्लेख गरेका थिए । सभ्य समाज निर्माणका लागि निरन्तर सचेतनामूलक कार्यक्रम आवश्यक रहेकोमा जोड दिइएको सहकर्मी ठबिन्द्र मगरले जानकारी दिनुभयो । यस्तै उपाध्यक्ष मगरले कुनै पनि जात–जातिमा विभेद हुन नहुने वर्तमान चेतनाको आवश्यकता औँल्याउँदै, सबै समुदायले एकअर्काको सम्मान गर्नुपर्ने बताउनुभयो ।

दलित समुदायले अपनाएका पेशा प्रति गर्व गर्नुपर्ने र कुनै पनि पेशालाई तुच्छ नठान्न अनुरोध गर्नुभयो । प्रमुख अतिथि ढुङ्गराज विश्वकर्माले भने, दलित समुदायका मौलिक पेशा—पञ्चेबाजा, सिलाई–कटिङ, आरन आदि—को संरक्षण र प्रवद्र्धन अत्यावश्यक रहेको बताउनुभयो । स्थानिय सरकारको पहलमा दलित समुदायको शिक्षा, रोजगार लगायतका क्षेत्रमा संघ र प्रदेश सरकारसँग समन्वय गरि कार्यक्रम अगाडि बढाइएको जानकारी गराउनुभयो । उक्त कार्यक्रम सञ्जालका अध्यक्ष हरि लगुनको सभाध्यक्षतामा सम्पन्न भएको थियो । कार्यक्रमले ताप्ली गाउँपालिकामा जातीय समानता र सामाजिक समावेशीतातर्फको सशक्त सन्देश दिएको सहभागीहरूको धारणा थियो ।