सोलुदुधकुण्ड १ टाक्सिन्दुको सार्वजनिक सुनुवाई : शतप्रतिशत प्रगति

जेठ २१, सोलुखुम्बु । सोलुदुधकुण्ड नगरपालिका वडा नम्बर १ टाक्सिन्दुको चालु आर्थिक बर्षका लागि विनियोजन गरेको बजेट र संचालित योजनाको शतप्रतिशत पूरा भएको छ । वडा कार्यालयमा बुधबार भएको सार्वजनिक सुनुवाई कार्यक्रममा वडा अध्यक्ष छोङ्बा शेर्पाले चालु आर्थिक बर्षको वडाको ४१ लाख बजेमा संचालित योजनाहरुको सम्पूर्ण काम सम्पन्न भएको जानकारी गराउनु भएको हो ।

  नगर प्रमुख नाम्गेलजाङ्बु शेर्पाको प्रमुख आतिथ्यता तथा रेडियो एभरेष्टको सहजिकरणमा भएको कार्यक्रममा वडा अध्यक्ष शेर्पाले वडाका सबै कामहरु पारदर्शी रुपमा अधिक्तम नागरिक सहभागिता मार्फत संचालन भएको र धेरै कामहरु आफ्नो ब्यक्तिगत पलहमा वडाको हितका लागि गरिएको बताउनु भयो । नगर प्रमुख नाम्गेल जाङ्बु शेर्पाले धार्मिक तथा पर्यटकीय दृष्टिले महत्वपूर्ण टाक्सिन्दु वडाको बृहत्तर विकासका लागि नगरपालिकाले बजेट विनियोजन गरेर विकास निर्माणका कामहरु भएको भन्दै अहिले टाक्सिन्दु जोड्ने मोटरबाटो पिच गर्ने काम शुरु भएको र छिर्दिघाटमा मोटरेबल पुलसमेत बनिसकेकाकाले टाक्सिन्दुको भौतिक विकासमा ठूलो टेवा पुगेको बताउनु भयो ।

साथै नुनथला बजारलाई ब्यवस्थित गर्न आगामि आर्थिक बर्ष २ करोड ८ लाख बजेट ब्यवस्थापन गर्ने प्रतिबद्धता ब्यक्त गर्नु भयो । वहाँ आगामि आर्थिक बर्षका लागि वडाको शिलिङ ५ लाखका दरले बढाईएको समेत जानकारी दिनुभयो । कार्यक्रममा वडा सचिव कुशुमलता श्रेष्ठले वडा बाट सम्पादित सेवा प्रवाहाको विस्तृत विवरण पेश गर्दै वडाले विभिन्न शिर्षकमा ६ लाख ५ हजार राजश्व संकलन भएको जानकारी गराउनु भयो ।  कार्यक्रममा सहभागि नागरिकले वडाको समग्र कार्यक्रम र कार्यशैली राम्रो भएको प्रतिक्रिया दिएका छन् ।  सार्वजनिक सुनुवाईमा वडाका प्रतिनिधिका अतिरिक्त विद्यालय, संघ संस्थाका प्रमुख तथा प्रतिनिधि, रेडक्रस, प्रहरी चौकी लगायतको प्रतिनिधित्व रहेको थियो ।