सोलुदुधकुण्ड नगरपालिकामा वृक्षरोपण गर्दै वातावरण दिवस मनाइयो

जेठ २२, सोलुखुम्बु । सोलुखुम्बुको सोलुदुधकुण्ड नगरपालिकाले विश्व वातावरण दिवसको अवसरमा नगर परिसरमा वृक्षरोपण कार्यक्रमको आयोजना गरी वातावरणप्रति दायित्वबोध र सचेतना अभिवृद्धि गर्ने प्रयासस्वरूप दिवस मनाएको छ । बिहिबार नगरपालिकाको कार्यालय परिसरमा वृक्षरोपण गरी उक्त दिवस मनाइएको हो ।

दिवसको अवसरमा नगर प्रमुख नाम्गेल जाङ्बु शेर्पाले वातावरण संरक्षणको विषयलाई प्राथमिकतामा राख्दै स्थानीय तहबाटै सकारात्मक पहल आवश्यक रहेकोमा जोड दिनुभयो । “वातावरण संरक्षण केवल सरकारी नीतिको कुरा होइन, यो प्रत्येक नागरिकको दायित्व हो,“ नगर प्रमुख शेर्पाले भन्नुभयो, “आजको वृक्षरोपणले भोलिका पुस्ताका लागि स्वच्छ हावा र हरियाली वातावरणको बीउ रोपेको छ ।” उक्त कार्यक्रममा नगर उप–प्रमुख गान्धी माया तामाङ, प्रमुख प्रशासकीय अधिकृत टुक्ति शेर्पा, नगर प्रवक्ता फुर्वा ग्याल्जेन शेर्पा, जनप्रतिनिधिहरू तथा नगरपालिकाका विभिन्न शाखामा कार्यरत कर्मचारीहरूको उपस्थिती रहेको थियो ।

वातावरण संरक्षण, हरियाली प्रवद्र्धन, तथा नगर क्षेत्रलाई हरित र स्वच्छ बनाउने उद्देश्य रहेको बताइएको छ । सहभागीहरूले नगर क्षेत्रभित्र वृक्षरोपण गरी हरियाली विस्तारमा सघाउने संकल्प समेत गरेका थिए । वातावरण दिवसको अवसरमा गरिएको यो अभियानले स्थानीय स्तरमा वातावरणीय सचेतनालाई थप प्रवद्र्धन गर्ने विश्वास व्यक्त गरिएको छ ।