जेठ २२, सोलुखुम्बु । विश्व वातावरण दिवस २०२५ को अवसरमा “प्लास्टिक प्रदूषण अन्त्य गरौं” भन्ने नारासहित सोलु हाइड्रोपावर लिमिटेडले सोलुखुम्बुको बरबोट आधारभूत विद्यालयमा “सिक्दै–सिकाउँदै” नामक सचेतनामूलक कार्यक्रम सम्पन्न गरेको छ । प्लास्टिकजन्य प्रदूषणका गम्भीर असरबारे विद्यालयका विद्यार्थी, शिक्षक तथा आयोजनासँग आबद्ध कर्मचारीहरूलाई जानकारी दिनुका साथै व्यक्तिगत, सामुदायिक र नीतिगत स्तरमा समाधानका उपायहरू खोज्न प्रेरणा प्रदान गर्नु कार्यक्रमको उद्देश्य रहेको आयोजक संस्थाले जनाएको छ ।
कार्यक्रम अन्तर्गत विद्यालय प्राङ्गणमा वृक्षारोपण गरिनुका साथै प्लास्टिकको प्रयोग घटाउने उपाय, फोहोर व्यवस्थापन तथा दीगो वातावरणीय अभ्यासहरूबारे सचेतनामूलक छलफल र अन्तरक्रिया कार्यक्रम सञ्चालन गरियो। सहभागीहरूले प्लास्टिकजन्य प्रदूषणको असर र यसको दीर्घकालीन समाधानबारे व्यवहारिक जानकारी प्राप्त गरेका थिए । कार्यक्रममा सोलु हाइड्रोपावर लिमिटेडका स्वास्थ्य, सुरक्षा तथा वातावरण प्रमुख डा. अभय बहुगुना, सुबिजन बुढाथोकी, कृष्ण बहादुर चौधरी, र सुदिप घिमिरेले विद्यार्थीहरूसँग अन्तरक्रिया गर्दै प्लास्टिक प्रदूषणसम्बन्धी विषयमा विस्तृत जानकारी प्रस्तुत गर्नुभएको थियो ।
कार्यक्रममा विद्यालयका ५५ जना विद्यार्थी तथा शिक्षक–कर्मचारीको सक्रिय सहभागिता रहेको थियो। सहभागीहरूमाझ बिरुवा वितरण गरिनुका साथै विद्यार्थीहरूको लागि खाजाको व्यवस्था समेत गरिएको थियो । उक्त कार्यक्रम सोलु हाइड्रोपावर लिमिटेडद्वारा प्रवद्र्धित ८२ मेगावाट क्षमताको तल्लो सोलु जलविद्युत् आयोजना अन्तर्गत सञ्चालन गरिएको हो ।
हाल आयोजनाको निर्माण कार्य अन्तिम चरणमा पुगेको छ र कम्पनीले आगामी असार महिनाभित्रै विद्युत् उत्पादन सुरु गर्ने लक्ष्यसहित कार्य तीव्र गतिमा अघि बढाइरहेको जानकारी दिएको छ । सोलु हाइड्रोपावर लिमिटेडले वातावरणीय संरक्षण तथा सामाजिक उत्तरदायित्वअनुसार प्रत्येक वर्ष विश्व वातावरण दिवसको अवसरमा विभिन्न कार्यक्रम सञ्चालन गर्दै आएको छ र आगामी दिनहरूमा यस्ता कार्यक्रमलाई निरन्तरता दिने जनाएको छ ।
Discussion about this post