गार्माका दश महिला उद्यम विकास तालिमबाट लाभान्वित

जेठ २२, सोलुखुम्बु । सोलुखुम्बुको सोलुदुधकुण्ड नगरपालिका–७, गार्मामा सञ्चालित सात दिने उद्यम विकास तालिमबाट १० जना महिला लाभान्वित भएका छन् । घरेलु तथा साना उद्योग कार्यालय सोलुखुम्बुको आयोजनामा र वडा कार्यालयको समन्वयमा जेठ १६ गतेदेखि सुरु भएको तालिम बिहीबार सम्पन्न भएको हो ।

तालिम कार्यवाहक वडा अध्यक्ष भलाकाजी कार्कीको अध्यक्षता तथा घरेलु तथा साना उद्योग कार्यालयका प्रमुख नारायण प्रसाद खतिवडाको प्रमुख आतिथ्यमा सम्पन्न भएको आयोजकले जनाएको छ । तालिम संयोजक टेक बहादुर बस्नेतका अनुसार सहभागीहरू सबै महिला थिए भने तालिमको सहजीकरण खेम माया विश्वकर्माले गर्नुभएको थियो । कार्यक्रममा बोल्दै वडा अध्यक्ष कार्कीले यस्ता तालिमहरूले ग्रामीण क्षेत्रमा स्वरोजगारको अवसर सिर्जना गर्ने विश्वास व्यक्त गर्नुभयो।

“हामीले यस्ता कार्यक्रमलाई निरन्तरता दिनुपर्छ ताकि हाम्रो वडा उद्यमशीलतामा आत्मनिर्भर बनोस्,” उहाँले भन्नुभयो । यस्तै प्रमुख अतिथि खतिवडाले तालिममा प्राप्त ज्ञानलाई व्यवहारमा उतार्न सहभागीहरूलाई आग्रह गर्नुभयो। उहाँले भन्नुभयो, “उद्योगको विकासका लागि दक्ष जनशक्ति अपरिहार्य छ। यस्ता तालिमले उद्यमशीलता प्रोत्साहित गर्न महत्त्वपूर्ण भूमिका खेल्छ ।” उक्त तालिम घरेलु उत्पादन, साना उद्योग सञ्चालन, व्यवस्थापन तथा विपणन सम्बन्धी ज्ञानमा केन्द्रित रहेको आयोजकले जनाएको छ ।