सोलुखुम्बुबाट राष्ट्रपति रनिङ शिल्डमा खेलाडी नपठाउने निर्णयप्रति शिक्षक महासंघको आपत्ति

जेठ २२, सोलुखुम्बु । कोशी प्रदेश सरकारअन्तर्गत खेलकुद विकास बोर्डले यही जेठ २४ देखि २६ गतेसम्म आयोजना गर्न लागेको प्रदेशस्तरीय राष्ट्रपति रनिङ शिल्ड प्रतियोगितामा सोलुखुम्बु जिल्लाबाट खेलाडी सहभागी नगराउने निर्णयप्रति नेपाल शिक्षक महासंघ सोलुखुम्बुले गम्भीर आपत्ति जनाएको छ । जिल्लाले समयमै खेलाडी छनौट गरी पठाउन नसक्दा प्रतियोगितामा सोलुखुम्बुबाट कुनै पनि खेलाडी सहभागी नहुने भएपछि शिक्षक महासंघले विज्ञप्ति जारी गर्दै उक्त निर्णयको विरोध जनाएको हो।

महासंघका अध्यक्ष जनक कुमार थापा र सचिव सूर्य बहादुर बस्नेतको संयुक्त हस्ताक्षर रहेको विज्ञप्तिमा भनिएको छ, “खेल जीवनसँगै शिक्षाको पनि अभिन्न हिस्सा हो । विद्यार्थीको क्षमता विकासमा खेलको भूमिका महत्वपूर्ण रहेकोले उनीहरुलाई वञ्चित गर्नु अनुचित छ ।” महासंघले प्रदेशस्तरीय प्रतियोगिताका लागि खेलाडी छनौट प्रक्रियामा शिक्षक महासंघसँग कुनै समन्वय नगरिएको र विद्यालय तहका विद्यार्थीलाई अनावश्यक रूपमा प्रतियोगिताबाट वञ्चित गरिएको भन्दै उक्त निर्णयप्रति गम्भीर आपत्ति जनाएको छ । विज्ञप्तिमा जिल्ला खेलकुद विकास समितिको निर्णयलाई भेदभावपूर्ण र एकपक्षीय ठहर गरिएको छ। साथै, समितिले लिएको निर्णयले विद्यालयस्तरमा खेलप्रति विद्यार्थी र शिक्षकको उत्साहलाई नै निरुत्साहित गर्ने खतरा रहेको भन्दै तत्काल निर्णय पुनर्विचार गर्न र विद्यालय तहका विद्यार्थीलाई सहभागिता सुनिश्चित गराउन महासंघले आग्रह गरेको छ ।

जिल्ला खेलकुद विकास समितिका अनुसार, प्रदेश खेलकुद बोर्डबाट आवश्यक बजेट नपाएको र जिल्लाले समेत आर्थिक व्यवस्थापन गर्न नसकेको कारणले प्रतियोगितामा सहभागी खेलाडी छनौट प्रक्रिया अघि बढाउन नसकिएको जनाइएको छ । यसले शिक्षा क्षेत्रसँग सम्बन्धित खेलकुद गतिविधिमा समन्वयको अभाव देखिएको शिक्षक महासंघको भनाइ छ । सोलुखुम्बुका शिक्षक र विद्यालय समुदायमा यस निर्णयले निराशा उत्पन्न गराएको छ भने महासंघले आगामी दिनमा यस्ता निर्णय गर्दा शिक्षा क्षेत्रका सरोकारवालासँग आवश्यक समन्वय गर्न सम्बन्धित निकायलाई आग्रह गरेको छ ।