जेठ २३, सोलुखुम्बु । अख्तियार दुरूपयोग अनुसन्धान आयोगले विद्यालय भवन निर्माणमा अनियमितता गरेको आरोपमा खोटाङका तत्कालीन जिल्ला शिक्षा अधिकारी ज्ञानमणि नेपालसहित ९ जनाविरुद्ध भ्रष्टाचार मुद्दा दायर गरेको छ। खोटाङ जिल्लाको दिप्रुङ चुईचुम्मा गाउँपालिका–७ मा अवस्थित कृष्णा उच्च माध्यमिक विद्यालयको भवन निर्माणको क्रममा रकम दुरुपयोग भएको ठहर गर्दै आयोगले शुक्रबार विशेष अदालत काठमाडौंमा मुद्दा दायर गरेको हो।
अख्तियारका प्रवक्ता राजेन्द्र कुमार पौडेलका अनुसार विद्यालय भवन निर्माणका लागि विनियोजित बजेटमा अनियमितता भएको भन्ने उजुरीका आधारमा अनुसन्धान गर्दा फिल्डमै काम नगरी झुटो विवरण पेस गरी रकम निकासा गरिएको पुष्टि भएको छ। अनुसन्धानका क्रममा २५ लाख ५० हजार रुपैयाँ दुरुपयोग गरिएको निष्कर्ष निकालिएको आयोगले जनाएको छ। आयोगले सार्वजनिक कोषको दुरुपयोग भएको ठहर गर्दै संलग्न सबै व्यक्तिहरूमाथि कानुनी कारबाही अघि बढाएको छ।
Discussion about this post