थुलुङ दुधकोशीले पायाे शल्यक्रिया सहितको आमा सुरक्षा कार्यक्रम संचालन अनुमती

जेठ २५, सोलुखुम्बु । सोलुखुम्बुको थुलुङ दुधकोशी गाउँपालिकालाई शल्यक्रिया सहितको आमा सुरक्षा कार्यक्रम संचालनको अनुमती प्राप्त भएको छ । स्वास्थ्य तथा जनसंख्या मन्त्रालय अन्तर्गतको स्वास्थ्य सेवा विभाग, परिवार कल्याण महाशाखाले उक्त कार्यक्रम संचालन गर्न स्वीकृति दिएको हो ।

गाउँपालिकाले २०८१ साल फागुन २१ गते उक्त कार्यक्रमका लागि सिफारिस गरेको थियो । त्यसअनुसार थुलुङ दुधकोशी अस्पतालले आवश्यक मापदण्डहरू पुरा गरी शल्यक्रिया सहितको आमा तथा नवजात शिशु सुरक्षा कार्यक्रमको स्वीकृतिको माग गरेको थियो ।

स्वास्थ्य सेवा विभागको २०८२ साल जेठ १६ गतेको निर्णयअनुसार, ’आमा तथा नवजात शिशु सुरक्षा कार्यक्रम निर्देशिका २०७८’ बमोजिम कार्यक्रम संचालन गर्न स्वीकृति दिइएको जनाइएको

छ ।

स्वीकृतिसम्बन्धी जानकारी स्वास्थ्य सेवा विभाग, परिवार कल्याण महाशाखाका निर्देशक डा. विवेक कुमार लालद्धारा हस्ताक्षरित सूचनामार्फत सार्वजनिक गरिएको छ । यो कार्यक्रम सुरु भएपछि थुलुङ दुधकोशी गाउँपालिकामा बसोबास गर्ने गर्भवती महिलाहरूलाई थप सुरक्षित र प्रभावकारी सेवा प्रदान गर्न मद्दत पुग्ने विश्वास लिइएको छ ।