सोलुदुधकुण्ड नगरपालिका ११ तिंलाको सार्वजनिक सुनुवाई : साँढे ११ करोड रकमको योजना संचालन

जेठ २५, साेलुखुम्बु । सोलुदुधकुण्ड नगरपलिका वडा नम्बर ११ तिंलामा चालु आर्थिक वर्षमा ११ करोड रकम बढीको योजना संचालन भएको छ । वडा कार्यलयको सभाहलमा आईतबार सम्पन्न सार्वजनिक सुुनुवाई कार्यक्रममा वडा अध्यक्ष टंकबहादुर कार्कीले वडा स्तरीय र नगरस्तरीय समेत गरि ३ करोड ८ लाख चौध हजार साथै प्रदेश र संघ स्तरीय ८ करोड २८ लाख गरि करिब साँढे ११ करोड रुपैँयाको योजना संचालन भएको जानकारी गराउनु भएको हो ।

नगर प्रमुख नाम्गेलजाङ्बु शेर्पाको प्रमुख आतिथ्यता र रेडियो एभरेष्टको सहजिकरणमा भएको कार्यक्रममा वडा अध्यक्ष कार्कीले जम्मा २९ वटा योजना सम्भौता भएकोमा १८ वटा योजना फरफराक र्भइसकेको र ११ वटा योजनाको काम सम्पन्न भई फरफराक हुन बाँकी रहेको जानकारी दिनुभयो । वहाँले वडाले कृषि, सडक र खानेपानीलाई उच्च प्राथमिक्ता दिएर काम गरिरहेको बताउनु भयो ।

कार्यक्रममा नगर प्रमुख नाम्गेल जाङ्बु शेर्पाले आफ्नो पहिलो कार्यकाल देखिनै तिंलाको विकासमा आफु अहोरात्र लागि परेको भन्दै आफ्नै पहलमा यो बर्ष साँढे ११ करोडको योजना एउटै वडामा संचालन गर्न सफल भएको बताउनु भयो । वहाँले भौगौलिक र जनसंख्या दुवै हिसाबमा ठूलो वडा तिंलामा ग्रामिण विद्युतिकरण गरि घरघरमा विद्युतीय चुलो वितरण गरेको भन्दै तिंलाको मुख्य सडकको कालो पत्रेको काम समेत थालनी भएको बताउनु भयो । नगर प्रमुख शेर्पाले तिंलाका सबै टोलमा बाटोको सहज पहुँच पुगेको भन्दै अब कृषिमा पनि ठूलो लगानी भित्र्याउन सफल भएको भन्दै यसको लाभ लिन सबै नागरिकलाई आग्रह गर्नु भयो ।

सुनुवाई कार्यक्रममा वडा सदस्य प्रेमकुमार राईले सबै जनताको भावना अनुसार नै वडाको नेतृत्व अगाडी बढेको धारणा राख्नु भयो । वडा सचिव दिलेन्द्रप्रसाद जोसीले चालु आर्थिक बर्षको सेवा प्रवाहको अवस्थाको बारेमा जानकारी दिँदै १२ लाख ७७ हजार रुपैँया आन्तरिक राजश्व संकलन गरेको उल्लेख गर्नु भयो ।

सुनुवाई विभिन्न राजनैतिक दलका प्रमुख तथा नागरिक समाजका अगुवाहरुले स्थानीय सरकारको काम सन्तोषजनक भएको भन्दै आगामि आर्थिक बर्षको योजना तर्जुमाका लागि सुझाव पेश गरेका थिए ।