स्टे एट स्कुलले कानुन अध्ययनका लागी फेलोसिप प्रदान गर्ने 

जेठ १७ सोलुखुम्बु ।  स्टे एट स्कुलले कानुन अध्ययन गर्न चाहने सोलुखुम्बुका ५ जना विद्यार्थीहरूका लागी फेलोसिप प्रदान गर्ने भएको छ ।  आज सदरमुकाम सल्लेरी आयोजित एक कानुन विषय सम्बन्धी परामर्शका बिच संस्थाले कानुन अध्ययन गर्न चाहाने महिला विद्यार्थीहरूका लागी फेलोसिप प्रदान गर्ने जानकारी गराएको हो ।

सोलुखुम्बुमा कानुन व्यवसायकोको क्षेत्रमा महिलाहरूको सहभागिता न्यून भएकाले जिल्लामा महिला कानुन व्यवसायी उत्पादनका लागी फेलोसिप प्रदान गरिने संस्थाले जनाएको छ ।  स्टे एट स्कुलका कार्यकारी निर्देशक गेले राप्के भोटेले संस्थाको कार्यक्षेत्र रहेका विद्यालयहरूका विद्यार्थीहरूलाई फेलोसिप प्रदान गरि काठमाण्डौको ऋत एकेडेमीमा कानुन संकाय अध्ययन गराउने जानकारी दिनुभयो ।

फेलोसिप मार्फत अध्ययन गर्ने विद्यार्थीहरूलाई संस्थाले पढाइ खर्च सहित अन्य खर्चहरू मासिक रुपमा उपलब्ध गराउने जानकारी गराइएको छ ।  लिखुपिके गाउँपालिका सोलुदुधकुण्ड नगरपालिका, माप्य दुधकोशी र थुलुङ दुधकोशी गाउँपालिकाका ५ जना विद्यार्थी छनौट गरि ऋत एकेडेमीमा फेलोसिप मार्फत कानुन संकाय अध्ययन गराइने छ ।  

एसइइ दिएर बसेका विद्यार्थीहरूलाई उनीहरूको क्षमताको आधारमा सबै विषयमा फेलाेसिप प्रदान गरिने भएपनि विशेष फेलोसिप कानुन संकायका लागी उपलब्ध गराइने जनाइएको छ । कार्यक्रममा ऋत एकेडेमीका प्रधानाध्यापक आनन्द कुमार यादवले नेपालकै पहिलो कानुन संकाय अध्ययन हुने कलेज ऋत एकेडेमी भएको बताउँदै विद्यार्थीहरूलाई पारिवारिक वातावरणमा अध्यापन गराइने बताउनुभएको छ ।

कार्यक्रममा स्टे एट स्कुल सोलुखुम्बुका कार्यक्रम निर्देशक प्रदिप थापा, फेलोसिप अफिसर छिरिङ शेर्पा लगायत विभिन्न विद्यालयका विद्यार्थी र अभिभावकहरूको उपस्थिति थियो ।