जेठ २९, साेलुखुम्बु । काठमाडौं जिल्ला अदालतले दुई अनलाइन पोर्टल — नेपालखबर डटकम र बिजमाण्डु डटकममा प्रकाशित समाचार हटाउने आदेश दिएसँगै नेपाली सञ्चार जगत्मा तरंग पैदा गरेको छ ।
धितोपत्र बोर्डका अध्यक्ष सन्तोषनारायण श्रेष्ठले दायर गरेको रिटमा मंगलबार सुनुवाइ गर्दै न्यायाधीश पीताम्बर शर्माको इजलासले समाचार तुरुन्त हटाउन आदेश दिएको थियो । यसले संविधानतः प्राप्त प्रेस स्वतन्त्रताको हनन् भएको सरोकारवालाहरूको भनाइ छ ।
नेपाल पत्रकार महासंघकी अध्यक्ष निर्मला शर्माले प्रकाशित समाचार हटाउन अदालतको आदेशप्रति आपत्ति जनाएकी छिन् । प्रेस काउन्सिल नेपालको क्षेत्राधिकार अदालतले मिचेको उनको भनाइ छ ।
‘सञ्चारमाध्यममा प्रकाशित–प्रसारित समाचारका विषयमा चित्त नबुझेको अवस्थामा पीडितको उजुरी लिने र त्यसविरुद्ध कारबाही गर्ने प्रेस काउन्सिल नेपालको क्षेत्राधिकारको विषय हो,’ ‘काउन्सिलको क्षेत्राधिकारलाई नजरअन्दाज गर्दै अदालतबाट भएको यो आदेश प्रेस स्वतन्त्रतासम्बन्धी अन्तर्राष्ट्रिय मूल्यमान्यता, नेपालको संविधान २०७२ का व्यवस्था र मर्म विपरीत भएको महासंघको ठहर छ भन्ने अध्यक्ष शर्माकाे भनाइ छ ।
अदालतको आदेश नेपालको संविधानका व्यवस्था र मर्म, प्रेस स्वतन्त्रताको प्रचलित मान्यता र अभ्यासविपरीत भएकाले आपत्तिजनक रहेको शर्माले बताइन् ।
यसैबीच महासंघले पनि एक विज्ञप्ति जारी गर्दै उक्त आदेशप्रति पुनर्विचार गर्न सम्बन्धित निकायसँग आग्रह गरेको छ । त्यसविरुद्ध अदालती प्रक्रिया तथा अन्य गतिविधि गर्न बाध्य हुने पनि महासंघले चेतावनी दिएको छ ।
Discussion about this post