जेठ २९ , सोलुखुम्बु। सोलुखुम्बुकाे सोलुदुधकुण्ड नगरपालिका–७ गार्मालाई बालमैत्री वडा घोषणा गरिएको छ । जिल्ला मै पहिलाे बालमैत्री वडा बनेकाे छ गार्मा । बालमैत्री स्थानीय शासन अवधारणालाई आत्मसात गर्दै बालमैत्री अभ्यासमा उल्लेखनीय प्रगति गरेपछि यो वडा जिल्लामै पहिलो बालमैत्री शासनयुक्त वडा बनेको हो ।
जिल्ला समन्वय समिति सोलुखुम्बुका प्रमुख कृष्णप्रसाद निरौलाको प्रमुख आतिथ्यता साथै नगरप्रमुख नाम्गेल जाङ्बु शेर्पा र नगर उपप्रमुख गान्धीमाया तामाङकाे विशेष आतिथ्यतामा बिहिबार
आयोजित विशेष समारोहबीच वडा नम्बर ७ लाई बालमैत्री वडा घोषणा गरिएको हो ।
नेपालमा २०६८ सालदेखि कार्यान्वयनमा आएको बालमैत्री स्थानीय शासन घोषणाका सूचकहरूअनुसार कुल ५१ वटा मध्ये ५० वटा अर्थात् ९८ प्रतिशतभन्दा बढी सूचाङ्क पूरा गरेपछि वडालाई बालमैत्री घोषणा गरिएको हो । जिल्ला समन्वय समिति प्रमुख निरौलाले बालमैत्री अभ्यासमार्फत सशक्त नागरिक निर्माण गर्ने प्रक्रियामा सोलुदुधकुण्ड नगरपालिका–७ को प्रयास उदाहरणीय भएको र यसरी नै यस वडाबाट अनयले पाठ सिक्नु पर्ने बताउनु भयाे ।
यस्तै, कार्यक्रममा नगरप्रमुख शेर्पाले विद्यालय, अभिभावक, सामुदायिक संस्थाहरू, युवा क्लबहरू र वडास्तरीय निकायहरूको साझा पहलले बालबालिकालाई केन्द्रमा राखेर योजना निर्माण, निर्णयमा सहभागी गराउने अभ्यास र प्राथमिकताको कार्यान्वयनमा सशक्त भूमिका निर्वाह गरिएको बताउनुभयो।
साेही अवसरमा नगर उपप्रमुख गान्धी माया तामाङले गार्माले इतिहास रचेको भन्दै खुसी व्यक्त गर्नु भयाे । साथै , साेही वडाका वडा अध्यक्ष सोनाम ग्याल्जेन शेर्पाले गार्मा वडाले हासिल गरेको यो ऐतिहासिक उपलब्धि सबैकाे सहयाेग र सक्रिय भूमिकाले सम्भव भएकाे बताउनु भयाे । बालबालिकाको शिक्षा, स्वास्थ्य, संरक्षण, सहभागिता, सिर्जनशीलता र सुरक्षा जस्ता आधारभूत अधिकारको प्रत्याभूति गराउने उद्देश्यसहित सोलुदुधकुण्ड–७ मा बाल अधिकारलाई शासकीय कार्यको मूल धारमा राखिएको उहाँकाे भनाइ थियाे ।
बालमैत्री स्थानीय शासन कार्यान्वयन निर्देशिका २०७८ अनुसार सेवा प्रवाह, संस्थागत संरचना, बाल सहभागिता र बाल अधिकारको प्रत्याभूति जस्ता सूचकहरूमा सोलुदुधकुण्ड नगरपालिका–७ अग्रसर देखिएको छ।सर्वेक्षण अनुसार यस वडाका ५१३ घरधुरीमा रहेका २ हजार ४६६ नागरिकहरू बालमैत्री सोच, व्यवहार तथा अभ्यासमा सहभागी भएका छन् ।
Discussion about this post