लिखुपिके –२ गोलीको वडा भेला : योजना बैंकका लागि छनौट शुरु

 लिखुपिको गाउँपालिका सोलुखुम्बुकी अध्यक्ष मिना कार्की बस्नेतले अब पालिकामा योजना बैंक मार्फत मात्रै योजना कार्यान्वयनको अभ्यास थालनी गर्ने बताउनु भएको छ । वडा नम्बर २ गोलीमा भएको ९ औँ वडा भेलालाई सम्बोधन गर्दै पालिका अध्यक्ष बस्नेतले अब पालिकाका जनताको आवश्यक्तालाई सम्बोधन गर्न प्राथमिक्ताका आधारमा योजना बैंक खडा गरि सोही योजनाहरुलाई बजेट विनियोजन गर्दै जाने बताउनु भयो ।

वहाँले अब पालिका भवन र अस्पताल पालिकाको गौरबको आयोजनाको रुपमा रहेको भन्दै आगामि बजेटमा प्राथमिकिकरण गर्ने बताउनु भयो । वडा अध्यक्ष मणिराज बस्नेतको सभापतित्वमा वडाको सभाहलमा भएको कार्यक्रममा पालिका उपाध्यक्ष ङवाङ ल्हाक्पा शेर्पाले पालिकामा सिमित बजेट रहेको र आवश्यक्ता धेरै रहेको भन्दै अधिक्तम जनतालाई लाभ हुने काममा बजेट विनियोजन गर्ने बताउनु भयो ।

वडा अध्यक्ष मणिराज बस्नेतले आफु जनताको सेवामा अहोरात्र खटिएको भन्दै चालु आर्थिक बर्षमा पारदर्शी रुपमा योजना संचालन गरेको बताउनु भयो । वडा नम्बर ३ का अध्यक्ष धु्रवबहादुर बस्नतले पालिकामा आउने आन्तरिक श्रोत सबै वडालाई समानुपातिक रुपमा वितरण गर्नु पर्ने धारणा राख्नु भयो ।

कार्यक्रममा नेपाली काँग्रेस महाधिबेशन प्रतिनिधि लोकेन्द्रजंग बस्नेत, नकेपा एमालेको पालिका सचिव तेजबहादुर बस्नेत, माओबादीको पार्टी प्रतिनिधि चरित्रबहादुर थापा लगायत सरोकारवालाले वडाको विकासमा सुझाव दिएका थिए । भेलाले वडाका हरेक टोलको आवश्यक्ताका आधारमा योजना छनौट गरिएको पालिका प्रवक्ता समेत रहेका वडा अध्यक्ष बस्नेतले जानकारी दिनुभयो ।