महाकुलुङमा १० विद्यालयका किशोर–किशोरीलाई लक्षित गर्दै यौन तथा प्रजनन स्वास्थ्य शिविर

जेठ ३०, सोलुखुम्बु । सोलुखुम्बुको महाकुलुङ गाउँपालिका र इकोहिमाल नेपालको संयुक्त आयोजनामा स्थानीय विद्यालयमा अध्ययनरत किशोर–किशोरीलाई लक्षित गरी एक दिने यौन तथा प्रजनन स्वास्थ्य शिविर तथा सम्मेलन सम्पन्न भएको छ । सगरमाथा माविको प्रांगणमा आयोजित कार्यक्रममा गाउँपालिका अध्यक्ष सूर्यबहादुर राईको प्रमुख आतिथ्यता तथा शिक्षक–अभिभावक संघ अध्यक्ष राजनमान राईसहित वडा अध्यक्षहरूको विशिष्ट सहभागिता रहेको थियो ।

स्थानीय १० वटा विद्यालयका किशोर–किशोरीहरू सहभागी उक्त सम्मेलनमा यौन तथा प्रजनन स्वास्थ्यसम्बन्धी चेतनामूलक विविध कार्यक्रम सञ्चालन गरिएको सहकर्मी झलक राईले जानकारी दिनुभयो । कार्यक्रममा छात्रा तथा छात्र वर्ग छुट्टाछुट्टै वक्तृत्वकला तथा सडक नाटक प्रतियोगिताको आयोजना गरिएको थियो । कार्यक्रमकी योजना अधिकृत गोमा शर्माले किशोर–किशोरीहरूको क्षमता अभिवृद्धि गरी समाजमा फैलिएको विकृति, विसङ्गति विरुद्ध आवाज उठाउन र धूम्रपान, मद्यपान तथा यौनजन्य दुव्र्यवहारबाट व्यक्ति, परिवार र समाजमा पर्न सक्ने नकारात्मक असर न्यूनीकरण गर्ने उद्देश्यले शिविर आयोजना गरिएको बताउनुभयो ।

वक्तृत्वकला प्रतियोगितामा छात्रा वर्गतर्फ “किशोरी आराम कक्षको महत्त्व“ विषयमा जनसुधार आधारभूत विद्यालय देनाम प्रथम, बासुकी आधारभूत विद्यालय दोस्रो र सगरमाथा मावि तेस्रो स्थानमा रहेका थिए । छात्र वर्गतर्फ “विद्यालय बालक क्लबको भूमिका“ विषयमा बासुकी आधारभूत विद्यालय प्रथम, गुदेल मावि दोस्रो र जनसुधार आधारभूत विद्यालय तेस्रो भएका थिए ।

सडक नाटक प्रतियोगितामा सगरमाथा माविले “धूम्रपान मद्यपानले व्यक्ति र समाजमा पारेको असर“, छेस्काम माविले “यौनजन्य दुव्र्यवहार न्यूनीकरणमा स्थानीय सरकारको भूमिका“ तथा गुदेल माविले “सामाजिक सञ्जालको व्यक्ति, समाज र परिवारमा पारेको असर“ विषयमा नाटक प्रस्तुत गरेका थिए । कार्यक्रमको समापनमा सहभागी विद्यालयलाई अजन्ता डिक्सनेरी र शैक्षिक सामग्री वितरण गरिएको थियो ।