रावा बेसी–५ दुबेकोलमा तीन दिने भाषणकला तालिम सम्पन्न, निक्कै प्रभावकारी रहेकाे सहभागीकाे भनाई

जेठ ३०, साेलुखुम्बु ।  खाेटाङकाे रावा बेसी गाउँपालिका–५ दुबेकोलमा आयोजना गरिएको तीन दिने भाषणकला तालिम आज सम्पन्न भएको छ। महिला सशक्तीकरण कार्यक्रम अन्तर्गत वडा कार्यालयद्वारा आयोजित उक्त तालिम जेठ २८ गतेबाट सुरु भई आज समापन भएको हो।

तालिमको उद्घाटन वडा अध्यक्ष मनकुमार गुरुङको अध्यक्षता र गाउँपालिका अध्यक्ष फटिक कुमार श्रेष्ठको प्रमुख आतिथ्यतामा भएको थियो। तालिममा दुबेकोलका महिलाहरूको सहभागिता उल्लेख्य रहेको थियो भने केही पुरुष सहभागी पनि रहेका थिए। करिब ४० जना सहभागीहरूलाई तालिम प्रदान गरिएको हो।

घनश्याम ढकालले तालिमको सहजीकरण गर्नुभएको थियो। कार्यक्रमको समापन समारोहमा गाउँपालिका उपाध्यक्ष कौशिला कुमारी गुरुङ, प्रमुख प्रशासकीय अधिकृत सरोज रेग्मीलगायतको उपस्थिति रहेको वडा सचिव शेरबहादुर दाहालले जानकारी दिनुभयो।

भाषणकला तालिममार्फत सहभागीहरूमा सार्वजनिक वाक्शैली, आत्मविश्वास अभिवृद्धि, विचार प्रस्तुत गर्ने तरिका लगायतका सीप विकास गराउने उद्देश्य रहेको थियो।