लगातारको वर्षाले नदी नाला उर्लिए, कोशी र कमला नदीमा खतराको तह पार

असार १, सोलुखुम्बु । लगातार परेको अविरल वर्षाका कारण देशका विभिन्न नदी र खोलाहरुमा पानीको सतह तीव्र रूपमा बढ्न थालेको छ। विशेषगरी धनकुटाको मछुवाघाटअन्तर्गत कोशी नदी र सिन्धुलीको रानीचुरीअन्तर्गत पर्ने कमला नदीमा पानीको सतह खतराको तह नाघेको बाढी पूर्वानुमान महाशाखाले जनाएको छ।

महाशाखाका अनुसार वर्षा अझै केही दिन कायम रहने पूर्वानुमान भएकाले खोला तथा नदी किनारमा बसोबास गर्ने बासिन्दालाई उच्च सतर्कता अपनाउन आग्रह गरिएको छ। त्यस्तै, देशका अन्य केही स्थानहरूमा पनि मध्यमदेखि भारी वर्षा भइरहेकाले संभावित बाढीको जोखिम बढेको छ। मकवानपुरको हेटौंडा र रजैया आसपास, धनुषाको चिसापानी क्षेत्र, बारा र रौतहटको रजुवा र चन्द्रपुर आसपास रहेका खोलाहरुमा पानीको बहाव थप बढ्न सक्ने देखिएको छ।

महाशाखाले बाढीको जोखिम रहेका क्षेत्रका स्थानीय प्रशासन, सुरक्षा निकाय र बासिन्दालाई सतर्क रहनुका साथै आवश्यक तयारी अवस्थामा रहन अनुरोध गरेको छ। साथै, जोखिमयुक्त क्षेत्रबाट अस्थायी रूपमा सुरक्षित स्थानमा सर्नसमेत सुझाव दिएको छ। बाढीबाट हुने सम्भावित मानवीय तथा भौतिक क्षति न्यूनीकरण गर्न सबै पक्ष एकजुट भएर सावधानी अपनाउनु आवश्यक भएको महाशाखाले स्पष्ट पारेको छ।