थुलुङ दुधकोशीमा “अपाङ्गता सम्बन्धि प्रारम्भिक पहिचान भएका विद्यार्थीहरुको स्वास्थ्य परीक्षण कार्यक्रम”

असार २, सोलुखुम्बु । सोलुखुम्बुको थुलुङ दुधकोशी गाउँपालिकाको आयोजनामा “अपाङ्गता सम्बन्धि प्रारम्भिक पहिचान भएका विद्यार्थीहरुको स्वास्थ्य परीक्षण कार्यक्रम” संचालन गरिएको छ । सोमबार गाउँपालिकाका अध्यक्ष असिम राईको प्रमुख आतिथ्यतामा उक्त कार्यक्रम संचालन गरिएको हो ।

कार्यक्रम थुलुङ दुधकोशी गाउँपालिकाभित्रका विभिन्न विद्यालयमा अध्यनरत विद्यार्थीहरूमा देखिएको सम्भावित अपाङ्गता अवस्थाको पहिचान तथा स्वास्थ्य परीक्षण गर्न उद्देश्यले आयोजना गरिएको जनाइएको छ । परीक्षण कार्यक्रममा विभिन्न शारीरिक, मानसिक तथा विकासजन्य अपाङ्गतासँग सम्बन्धित प्रारम्भिक लक्षणको पहिचान तथा आवश्यक परामर्श प्रदान गरिएको थियो । उक्त कार्यक्रममा गाउँपालिका उपाध्यक्ष सबिता राई, अन्य वडाका वडा अध्यक्ष लगायत शिक्षक, विद्यार्थीहरुको उपस्थिती रहेको थियो ।

कार्यक्रमपश्चात अध्यक्ष राईले थुलुङ दुधकोशी अस्पतालमा उपचाररत बिरामीहरूको स्वास्थ्य अवस्थाबारे समेत जानकारी लिनुभएको छ । अस्पतालमा भर्ना भएका बिरामीहरूसँग प्रत्यक्ष भेटघाट गरी स्वास्थ्य सेवा, उपचारको अवस्था र अस्पताल व्यवस्थापनसम्बन्धी विषयमा चासो व्यक्त गर्नुभएको थियो ।

गाउँपालिकाले आगामी दिनमा अपाङ्गता पहिचान तथा उपचारसँग सम्बन्धित यस्ता कार्यक्रमहरूलाई अझ प्रभावकारी बनाउँदै लैजाने योजना बनाएको जनाएको छ । अध्यक्ष राईले स्वास्थ्य तथा शिक्षा क्षेत्रमा समावेशी दृष्टिकोणबाट स्थानीय तहको प्रतिबद्धता दोहोर्याउनुभएको थियो ।