ओखलढुंगामा सोलुखुम्बु आउँदै गरेको यात्रुबहाक बस दुर्घटना, ४ जना घाइते

असार ४, सोलुखुम्बु । काठमाण्डौंबाट सोलुखुम्बु आउँदै गरेको यात्रुवाहक बस ओखलढुंगाको सिद्धिचरण नगरपालिका–८ जरङगेमा दुर्घटना भएको छ। बुधबार दिउँसो करिब १ बजे बा.प्र. ०१–००६ख ५५८१ नम्बरको बस अनियन्त्रित भई सडकबाट करिब ४–५ मिटर तल खस्दा दुर्घटना भएको हो। जिल्ला प्रहरी कार्यालय ओखलढुंगाका सूचना अधिकारी प्रहरी निरीक्षक विजय कार्कीका अनुसार दुर्घटनाको खबर प्राप्त भएलगत्तै प्रहरी नायव उपरीक्षक मदन के.सी.को कमाण्डमा १५ जनाको प्रहरी टोली घटनास्थलमा परिचालन गरिएको थियो।

घाइतेहरुलाई उद्धार गरी नजिकैको मेडिका पोलिक्लिनिक, रमाइलोडाँडामा उपचारका लागि लगिएको छ। दुर्घटनामा चम्पादेवी–३ की कुमारी माया बुढाथोकी, बसका सहचालक मानेभञ्ज्याङ–३ का विनोद अधिकारी, सिद्धिचरण–८ का रोशन गिरी र सुनकोशी–१ बल्खुका सहदेव गिरी घाइते भएका छन्।

उनीहरुको अवस्था सामान्य रहेको प्रहरीले जनाएको छ।  दुर्घटनाको थप अनुसन्धान भइरहेको जनाइएको छ।