महाकुलुङ गाउँपालिकामा यौन तथा प्रजनन स्वास्थ्य सम्बन्धी तीनदिने पुनर्ताजगी तालिम सम्पन्न

असार ४, सोलुखुम्बु । महाकुलुङ गाउँपालिकाको सहकार्यमा इको हिमालद्वारा सञ्चालित तीनदिने यौन तथा प्रजनन स्वास्थ्यसम्बन्धी पुनर्ताजगी तालिम हालै सम्पन्न भएको छ। तालिममा स्थानीय माध्यमिक र निम्न माध्यमिक विद्यालयका २० जना शिक्षक तथा शिक्षिकाहरू सहभागी भएका थिए। कार्यक्रम गाउँपालिका अध्यक्ष सुर्य बहादुर कुलुङ र उपाध्यक्ष बिपना कुलुङको सभापतित्वमा सम्पन्न भएको सहकर्मी झलक राईले जानकारी दिनुभयो । तालिमको उद्देश्य विद्यालय शिक्षकहरूलाई किशोर–किशोरी मैत्री यौन तथा प्रजनन स्वास्थ्य शिक्षामा दक्ष बनाउँदै उनीहरूलाई सहजीकरण सीप प्रदान गर्नु रहेको थियो। इको हिमालका प्रशिक्षक तथा कन्सल्टेन्ट बिन्जु बरालद्वारा सहजीकरण गरिएको उक्त तालिममा सहभागी शिक्षकहरूले अब विद्यालयमा छुट्टै कक्षा सञ्चालन गरी किशोर–किशोरीहरूलाई यौन तथा प्रजनन स्वास्थ्यसम्बन्धी शिक्षण गराउने प्रतिबद्धता व्यक्त गरेका छन्।

तालिमको मुख्य कार्ययोजना आठ वटा प्रमुख विषयहरूमा केन्द्रित थियो :

किशोर–किशोरी अवस्थामा हुने शारीरिक र मानसिक परिवर्तन तथा हस्तमैथुन,

प्रजनन अंगहरूको कार्य प्रणाली,

महिनावारी चक्र, सरसफाइ र किशोरीमैत्री सेवा,

गर्भधारणको प्रक्रिया,

यौन तथा प्रजनन स्वास्थ्य,

यौनजन्य हिंसा, कारण, प्रकार र कानुनी उमेर सीमा,

यौनजन्य हिंसासम्बन्धी कानुनी तथा स्वास्थ्य उपचार,

बालविवाह, प्रेम, आकर्षण, यौन चाहना र सामाजिक दबाब।

कार्यक्रममा २५ जनाको उपस्थिति रहेको थियो भने सहभागीहरूले तालिमले आफूहरूलाई विद्यालयमा अझ प्रभावकारी ढंगले यौन तथा प्रजनन स्वास्थ्य शिक्षा दिन सहयोग पुग्ने प्रतिक्रिया दिएका छन्।

यस कार्यक्रमले १० देखि १९ वर्षसम्मका किशोर–किशोरीबीच यौन तथा प्रजनन स्वास्थ्यको विषयमा जनचेतना फैलाउने र अभिभावक स्तरमा पनि सजगता बढाउने अपेक्षा गरिएको छ।