लिम्चुङ्बुङ गाउँपालिका–५ जाँतेमा जन्मदर्ता अभियान सम्पन्न

असार ४, सोलुखुम्बु । उदयपुर जिल्लाको लिम्चुङ्बुङ गाउँपालिका–५ जाँते मिनासिकामा आज जन्मदर्ता अभियान कार्यक्रम सफलता साथ सम्पन्न भएको छ । भौगोलिक विकटता र अशिक्षाका कारण आफ्नो जन्मदर्ता गराउन नसकेका बालबालिकालाई लक्षित गरी आयोजना गरिएको कार्यक्रममा ६ जना बालबालिकाको जन्मदर्ता प्रमाणपत्र प्रदान गरिएको छ ।

जाल्पा एकीकृत विकास समाज उदयपुरको सहयोगमा तथा वडा बाल अधिकार समिति र वडा कार्यालय जाँतेको आयोजनामा कार्यक्रम सम्पन्न भएको बालमैत्री स्थानीय शासन फोकल पर्सन मिलन परियारले जानकारी दिनुभयो । यस अभियानबाट सामाजिक पहिचान र नागरिकताको आधार बन्ने जन्मसिद्ध अधिकारबाट वञ्चित बालबालिकाले आधिकारिक कागजात प्राप्त गरेका छन् । कार्यक्रममा वडा अध्यक्ष कबिचन्द्र राई, वडा सचिव तथा स्थानीय पञ्जिकाधिकारी केशब कुमार थापा, वडा सदस्य ठाकुर प्रसाद कोइराला, शिक्षक, अभिभावक तथा स्थानीय समाजसेवीहरूको उपस्थिति रहेको थियो ।

कार्यक्रममा बोल्दै वडा अध्यक्ष राईले यस्तो अभियानले सबै नागरिकलाई राज्यको मूलधारमा ल्याउन मद्दत पुग्ने बताउनुभयो । यस्तै, सचिव थापाले निरन्तर यस्ता कार्यक्रम सञ्चालन गरी सबै नागरिकलाई अनिवार्य नागरिक कागजात उपलब्ध गराउने लक्ष्य रहेको बताउनुभयो । स्थानीय समुदायमा सकारात्मक सन्देश दिने खालको यो अभियानले अन्य वडाहरूमा पनि यस्ता कार्यक्रम विस्तार गर्नुपर्ने आवश्यकता औँल्याएको छ ।