शेर्पा समाज वेल्जियम र जर्मनको विषेश आर्थिक सहयोमा खिजीदेम्बालाई शव वाहन

असार ४, सोलुखुम्बु । सामाजिक सेवाको एउटा अनुकरणीय उदाहरण प्रस्तुत गर्दै ओखलढुंगाको खिजिदेम्बा गाउँपालिकामा शव वाहन सेवा सञ्चालनमा ल्याइएको छ । यस सेवाको सुरुआत शेर्पा समाज बेल्जियम र जर्मनीको विशेष आर्थिक सहयोगमा गरिएको हो । करिब ९ लाख १३ हजार रुपैयाँ बराबरको लागतमा गाउँपालिकामा पुरानो भएर संचालनमा नआएको पुरानो एम्बुलेन्सलाई मर्मत सम्हार गरी शव वाहनका लागि प्रयोग गरिने भएको छ ।

उक्त शव वाहन अब गाउँपालिकाका नागरिकहरूको सेवा गर्न तत्पर छ । यो शव वाहन खिजिदेम्बाका लागि मात्र नभई आसपासमा रहेका स्थानीय तहका नागरिकहरुले समेत नि : शल्क रुपमा सेवा लिन पाउने भएका छन् । पालिकाका अध्यक्ष गम्बु शेर्पाले यस सामाजिक प्रयासको नेतृत्व गर्दै शव वाहन हस्तान्तरणको औपचारिक जानकारी दिनुभएको छ । उहाँले गएको ग्याल्पो ल्होसार अवसरमा बेल्जियम, जर्मन लगायत अन्य देशहरुमा आयोजित सांस्कृतिक कार्यक्रममा आफ्नो सशक्त प्रस्तुतीमार्फत यो परियोजनाका लागि आवश्यक सहयोग संकलनमा समेत योगदान दिनुभएको थियो ।

गाउँका धेरैजसो नागरिकहरू आर्थिक अभावमा जीवनयापन गरिरहेका छन् । विपद् वा आत्महत्याका घटनापछि शवलाई अन्तिम संस्कारका लागि रुम्जाटार वा मन्थली लैजानुपर्ने बाध्यता छ, जहाँ अन्य साधनहरूले शव बोकेनसक्ने वा अत्यधिक शुल्क लिने गर्दछन् । यस्तो कठिनाइलाई बुझ्दै गाउँपालिकाले शव वाहनको व्यवस्था गरेको हो । “समाजका निम्न आर्थिक वर्गलाई मृत्युको क्षणमा पनि पीडाबाट मुक्त गराउने यो प्रयास एक मानवीय अभियान हो,“ अध्यक्ष शेर्पाले बताउनुभयो । अमेरिकाबाट फर्केर देश निर्माणमा लागेका गम्बु शेर्पा २०७९ सालको स्थानीय निर्वाचनमा निर्वाचित भई हाल खिजिदेम्बा गाउँपालिकाको अध्यक्षको जिम्मेवारी सम्हालि रहनुभएको छ ।

संगीत क्षेत्रमा अब्बल अध्यक्ष शेर्पा आफ्ना प्रस्तुतीमार्फत जनचेतना र सामाजिक सहयोगका सन्देश फैलाउँदै आउनुभएको छ । उहाँ भन्नुहुन्छ अब युवाले देश बनाउने सपना मात्र होइन, त्यसलाई व्यवहारमा पनि उतार्नुपर्छ।“ शव वाहन सेवा केवल सवारीको व्यवस्था होइन, यो सन्देश पनि हो—समाजको हरेक तहमा सहानुभूति, सहयोग र सम्मानको आवश्यकता छ । यो प्रयासले अन्य पालिकाहरूका लागि पनि प्रेरणा बन्ने आशा गरिएको छ ।