सोलुखुम्बुमा कानुन तथा क्षमता विकास र मनोविमर्श गोष्ठी सुरु

असार ५, सोलुखुम्बु । सल्लेरी सामुदायिक सिकाइ केन्द्र, सोलुखुम्बुको आयोजनामा “कानुन तथा क्षमता विकास र मनोविमर्श गोष्ठी” सोलुदुधकुण्ड नगरपालिका–४ स्थित एक होटलमा बिहीबारबाट सुरु गरिएको छ । कार्यक्रमको उद्घाटन सल्लेरी सामुदायिक सिकाइ केन्द्रकी अध्यक्ष सौमाया राईको अध्यक्षता तथा शिक्षा विकास तथा समन्वय इकाई, सोलुखुम्बुका प्रमुख पुण्यराज डंगोलको प्रमुख आतिथ्यतामा सम्पन्न भएको आयोजकले जनाएको छ ।

उद्घाटन कार्यक्रममा प्रमुख अतिथि डंगोलले यस्ता तालिमहरुले समुदायको समग्र सशक्तिकरणमा ठूलो भूमिका खेल्ने विश्वास व्यक्त गर्नुभयो । उहाँले कानुनी चेतना र व्यक्तिगत क्षमता विकास आजको आवश्यकता भएको उल्लेख गर्दै सहभागीहरूप्रति सक्रिय सहभागिता जनाउन आग्रह गर्नुभयो । यस्तै घरेलु तथा साना उद्योग कार्यालय सोलुखुम्बुका प्रमुख नारायण प्रसाद खतिवडाले तालिममा सहजीकरण गर्नुहुँदै, महिलाहरूको सीप विकास र आत्मनिर्भरता निर्माणका लागि यस्ता कार्यक्रमहरू प्रभावकारी हुने बताउनुभयो ।

दुई दिनसम्म सञ्चालन हुने तालिममा विभिन्न समूहका करिब २५ जना महिलाहरूको सक्रिय सहभागिता रहेको आयोजकले जनाएको छ । सहभागीहरूले तालिमले आफूहरूलाई कानुनी जानकारी, आत्मविश्वास अभिवृद्धि तथा व्यक्तिगत तथा सामूहिक नेतृत्व क्षमतामा मद्दत पुग्ने विश्वास व्यक्त गरेका छन् । कार्यक्रममा स्थानीय महिला अगुवा, सामुदायिक संस्था प्रतिनिधि लगायतको उपस्थिति रहेको थियो । तालिम समापनपछि सहभागीहरूलाई प्रमाणपत्र वितरण गरिनेछ ।