सुनकोशी नदी किनारमा भेटिएको वृद्ध महिलाको शवको पहिचान, जानुका बराल रहेको पुष्टि

असार ५, सोलुखुम्बु । ओखलढुंगाको मानेभञ्ज्याङ गाउँपालिका–७, हर्कपुरस्थित सुनकोशी नदी किनारमा फेला परेको एक वृद्ध महिलाको शवको पहिचान भएको छ। सिन्धुली जिल्लाको गोलन्जोर गाउँपालिका वडा नम्बर ३ की ७६ वर्षीया जानुका बरालको शव भएको पुष्टि जिल्ला प्रहरी कार्यालय ओखलढुंगाले जनाएको छ। प्रहरी निरीक्षक विजय कार्कीका अनुसार, शवको सनाखत बरालका छोरा पुरुषोत्तम बरालले गरेका हुन्।

उनले घटनास्थलमै पुगेर शव हेरेपछि आफ्नी आमाको भएको पुष्टि गरेका थिए। प्रहरी कार्यालयका अनुसार, आज विहान करिब ६ः२० बजे नदी किनारमा शव देखिएको सूचना प्राप्त भएपछि प्रहरी निरीक्षक कार्कीको कमाण्डमा प्रहरी टोली घटनास्थलतर्फ खटिएको थियो। प्रारम्भिक कानुनी प्रक्रिया पूरा गरी शवलाई पोस्टमार्टमका लागि जिल्ला अस्पताल सिन्धुली पठाइएको छ। शव कसरी नदी किनारमा पुग्यो भन्ने विषयमा अनुसन्धान भइरहेको प्रहरीले जनाएको छ । घटनाले शंका उत्पन्न गराएको हुँदा विस्तृत अनुसन्धान अघि बढाइएको बताइएको छ।