सोलुखुम्बुमा भोलिबाट “ट्राफिक सप्ताह २०८२” सुरु : सडक अनुशासन र दुर्घटना न्यूनीकरणको अभियान

असार ५, सोलुखुम्बु । हिमाली जिल्ला सोलुखुम्बुमा “ट्राफिक सप्ताह २०८२” जेठ ६ गते सुरु हुने भएको छ । सडक अनुशासन प्रवद्र्धन गर्ने र सवारी दुर्घटनाको जोखिम न्यूनीकरण गर्ने उद्देश्यका साथ यो सप्ताह मनाउन लागिएको हो । कोशी प्रदेश सरकारअन्तर्गत आन्तरिक मामिला तथा कानुन मन्त्रालय, विराटनगर र नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, इटहरी सुनसरीको संयुक्त आयोजनामा ट्राफिक सप्ताह सञ्चालन गरिने आयोजकले जनाएको छ ।

सप्ताहको उद्घाटन सोलुदुधकुण्ड नगरपालिकाका मेयर नाम्गेल जाङ्बु शेर्पाको प्रमुख आतिथ्यतामा सदरमुकाम सल्लेरीमा गरिने छ । जिल्ला ट्राफिक कार्यालय सोलुखुम्बुका इन्चार्ज कृष्ण कट्वालका अनुसार कार्यक्रम बिहान ७ः४५ बजे जिल्ला समन्वय समितिको प्रांगणबाट सुरु हुने छ । त्यसपछि सवारी सचेतना र्याली निकालिने र उद्योग वाणिज्य संघको सभाहलमा औपचारिक कार्यक्रम आयोजना गरिनेछ । सप्ताहभर विभिन्न सचेतनामूलक कार्यक्रम, विद्यार्थी र सर्वसाधारणका लागि ट्राफिक नियम सम्बन्धी जानकारीमूलक सत्र, सडक सुरक्षामा सहभागिता अभिवृद्धि गर्ने अभिमुखीकरण तथा सवारी चालकहरूका लागि अनुशासन र व्यावसायिक प्रशिक्षणसमेत सञ्चालन गरिने जनाइएको छ ।

कार्यक्रमको मूल उद्देश्य भनेको सडकमा बढ्दो लापरवाही, नियम उल्लङ्घन र लापरवाह सवारी चलाउने प्रवृत्तिलाई निरुत्साहित गर्दै सडक प्रयोगकर्तामा ट्राफिक नियमबारे जानकारी अभिवृद्धि गर्नु रहेको आयोजकले बताएका छन् । सोलुखुम्बु जिल्लामा पछिल्लो समय सवारीसाधनको चाप बढ्दै गएसँगै दुर्घटनाका घटनाहरू समेत वृद्धि हुँदै गएकाले स्थानीय प्रशासन, ट्राफिक प्रहरी र सरोकारवाला निकाय मिलेर सडक सुरक्षालाई प्राथमिकतामा राखेर यस्तो अभियान सञ्चालन गरिएको हो ।