वडास्तरीय हाजिरीजवाफ प्रतियोगिताको उपाधि त्रिभुवन विद्योदय आविलाई

असार ६, सोलुखुम्बु । सोलुखुम्बुको थुलुङ दुधकोशी गाउँपालिका वडा नम्बर ६ मुक्लीको आयोजनामा भएको आधारभूत तह वडास्तरीय हाजिरीजवाफ प्रतियोगितामा त्रिभुवन विद्योदय आवि प्रथम भएको छ । शुक्रबार सम्पन्न प्रतियोगितामा वडा भित्रका ६ ओटा विद्यालयले सहभागिता जनाएका थिए । वडाको आर्थिक वर्ष २०८१/८२ मा वालबालिका लक्षित कार्यक्रमअन्तर्गत शैक्षिक सत्रको प्रारम्भमै शैक्षिक गुणस्तर मापन तथा विद्यार्थीको सिकाइ मूल्याङ्कन गर्ने उद्देश्यले सो प्रतियोगिता आयोजना गरिएको वडा अध्यक्ष तथा वडा शिक्षा समिति संयोजक महेन्द्रदीप राईले बताउनुभयो ।

कक्षा १–५ तहको प्रतियोगितामा ७ टिम सहभागी थिए । उक्त तहमा त्रिभुवन विद्योदय आवि प्रथम, पञ्चकन्या आवि द्वितीय तथा बिरेन्द्रोदय माबि तृतीय भएका छन् । त्यसैगरी, कक्षा ६–८ तहमा ६ टिम सहभागी हुँदा त्रिभुवन विद्योदय आवि (समूह क) ले प्रथम स्थान, बिरेन्द्रोदय माबिले द्वितीय स्थान र त्रिभुवन विद्योदय आवि (समूह ख) ले तृतीय स्थान हासिल गरेको वडा सचिव युबराज राईले जानकारी दिनुभयो । प्रथम, द्वितीय र तृतीय स्थान हासिल गर्ने विद्यालयहरूलाई क्रमशः नगद ५ हजार, ४ हजार र ३ हजार रुपैयाँसहित प्रमाणपत्र र शैक्षिक सामग्री प्रदान गरिएको छ ।

सहभागी सम्पूर्ण विद्यालयलाई समेत १ हजारको साथमा प्रमाणपत्र वितरण गरिएको छ । कार्यक्रममा कक्षा १–५ का विद्यार्थीहरूले ७१ प्रतिशत र कक्षा ६–८ का विद्यार्थीहरूले ६६ प्रतिशत प्रश्नहरूको सहि उत्तर दिएका थिए । कार्यक्रमको विश्वसनीयता र स्तर सुनिश्चित गर्न प्रश्नपत्र निर्माण र निर्णायक प्रमुखको भूमिकामा कालिका देवी मावि, पञ्चनको प्रधानाध्यापक प्रकाश थुलुङ राई रहेका थिए । वडा अध्यक्ष राईले यस्तै प्रकृतिका कार्यक्रमहरू शैक्षिक सत्रको अन्त्यमा पुनः मूल्याङ्कनका लागि सञ्चालन गरिने प्रतिबद्धता व्यक्त गर्नुभयो ।