सोताङ गाउँपालिकाले सार्वजनिक गर्यो शैक्षिक श्वेतपत्र

असार ६, सोलखुम्बु । सोलुखुम्बुको सोताङ गाउँपालिकाले शैक्षिक श्वेत पत्र सार्वजनिक गरेको छ । शुक्रबार गाउँपालिकाको गुणस्तर अभिवृद्धि गर्दै समावेशी तथा गुणस्तरीय शिक्षालाई सुनिश्चित गर्न यो श्वेतपत्र सार्वजनिक गरिएको हो । “गुणस्तरीय शिक्षा हाम्रो प्रतिबद्धता, संस्कार सहित शिक्षा आजको आवश्यकता“ भन्ने मूल नाराका साथ, पालिका अध्यक्ष खिलराज बस्नेतको अध्यक्षतामा आयोजित कार्यक्रममा शैक्षिक श्वेत पत्र २०८२ साउन १ गतेबाट लागू हुने गरि सार्वजनिक गरिएको सहकर्मी झलक राईले जानकारी दिनुभयो । ४७ बुँदे शैक्षिक श्वेत पत्र विद्यालय प्रोफाइल लगायतको १४ वटा सूचक समावेश छन् । शिक्षक डायरी, विद्यार्थी डायरी एवम् विद्यार्थी मूल्याङ्कन फारम प्रयोग, पाठ्यपुस्तक रहित पाठ्यक्रम र शिक्षक निर्देशिका, विद्यालयमा पुर्णरुपमा जङ फुट निषेध, आई सि टि प्रयोगलाई उच्चतम प्रयोग, पालिका र शिक्षक ५० ५० प्रतिशतमा हरेक शिक्षकको साथमा ल्यापटप रहने गरी श्वेत पत्र जारी गरिएको गाउँपालिका प्रमुख खिलराज बस्नेतले बताउनुभयो । श्वेत पत्र निर्माण समितिमा शिक्षा शाखा संयोजक रित बहादुर बस्नेतको नेतृत्वमा रीड नेपालका शिक्षा विकास अधिकृत नार्केल भला बस्नेत, बासुकी आधारभूत विद्यालयका पदम भुजेल, वीरेन्द्र ज्योति माविका मोतीराम बस्नेत, हुलु माविका टङ्क प्रसाद दाहाल, सिआइटिसी संस्थाका गीता कुलुङ र सेतो गुराँस राष्ट्रिय बालबिकास केन्द्र सेवाका झपट बहादुर बोहरा सदस्य रहेका थिए ।