गौरीटाप बहुउद्देश्यीय सहकारीमा ५ वर्षमा ७० लाखको सेयर पुँजी 

जेठ १८, साेलुखुम्बु ।  खोलुखुम्बुको गौरीटाप बहुउद्देश्यीय सहकारी संस्थाले ५ वर्षमा झण्डै ७० लाख रुपैयाँ को सेयर पुँजी जम्मा गरेको छ ।  आर्थिक वर्ष २०७४/७५ मा संस्थामा रहेको १० हजार ७ सय ७० रुपैयाँको सेयर पुँजी मा वृद्धि गरेर ५ वर्षको अवधीमै संस्थाले ६९ लाख ३९ हजार ३ सय ३ रुपैयाँको सेयर पुँजी जम्मा गरेको छ ।  

आज शुक्रबार सल्लेरीमा सम्पन्न संस्थाको २८ औँ साधारणसभामा वार्षिक प्रतिवेदन पेश गर्दै सहकारी संस्थाका अध्यक्ष रामचन्द्र कार्कीले संस्थाले ५ वर्षमा अगणित सफलता हात पारेको भन्दे यस्तो जानकारी गराउनुभएको हो । यस्तै सहकारी संस्थामा आर्थिक वर्ष २०७४/७५ मा रहेको सेयर सदस्य संख्या ४ सय ८ जनाबाट बढेर अहिले ३ हजार १ सय २५ पुर्‍याएको जानकारी दिनुभयो ।

यस्तै उक्त आर्थिक वर्षमा ५ सय रुपैयाँ घाटामा रहेको सहकारी संस्था अहिले ९ लाख ३१ हजार ५ सय ३३ रुपैयाँ नाफामा रहेको, १ हजार ७ सय मात्र कर्जा लगानी रहेको सहकारीमा अहिले ५ करोड ८६ लाख ९ हजार २ सय ३१ रुपैयाँ कर्जा लगानी गरिएको, सुन्य बचत रहेको संस्थामा अहिले ४ करोड ७७ लाख २४ हजार ५ सय ३३ रुपैयाँ बचत रहेको, सहकारी सम्बन्धी विषयगत कोषहरू ३१ लाख १७ हजार ७ सय २९ रुपैयाँ बराबर रहेको जनाइको छ ।

 यस्तै उक्त आर्थिक वर्षमा सहकारी संस्थासँग १२ हजार ७ सय ६० रुपैयाँको चल अचल सम्पत्ति मात्र रहेकोमा अहिले ५ करोड ८३ लाख २८ हजार ८ सय ६३ रुपैयाँ सम्पत्ति रहेको प्रतिवेदन सार्वजनिक गरिएको छ । यस्तै प्रतिवेदन सार्वजनिक गर्दै अध्यक्ष कार्कीले तिङ्ला र सल्लेरीमा कार्यालय स्थापना गरि सेवा दिइँदै आएको, १० जना युवाहरूलाई रोजगारीको अवसर प्रदान गरिएको, सहकारी मार्फत पुँजी बजारमा लगानी गरि हाट बजार, व्यापार व्यवसाय सञ्चालन गरि स्थानीय उत्पादनलाई प्रवर्द्धन गरिएको, सानातिना क्लब वा समुहबाट हुने खेलकुद तथा अन्य कार्यक्रमहरूमा प्रायोजन गर्दै आएको सेयर सदस्य तथा बचतकर्ताको हितका लागी राहतकोष व्यवस्था गरिएको बताउनुभएको छ ।  जिल्लाकै पहिलो सहकारी भएपनि विभिन्न आरोह अवरोह झेल्दै आएको सहकारीलाई ब्युँताउँदै अहिले कार्यक्षेत्र बढाएर काम गरिरहेको उहाँको भनाई छ ।

 छोटो समयमा धेरै उपलब्धीहरू हासिल गरेको भन्दै उहाँले यसलाई संस्थागत गर्न सबैको साथ आवश्यक रहने जिकिर गर्नुभएको छ । यस्तै सहकारी संस्थाले आफ्ना बचतकर्ताहरू मध्यबाट २०८० सालको एसइइमा उत्कृष्ट नतिजा ल्याउन सफल विद्यार्थीलाई नगद एक हजार रुपैयाँ सहित सम्मान गरेको छ ।  

विद्यार्थी दिपिका दयाललाई एइइ परीक्षामा उत्कृष्ट नतिजा ल्याउन सफल भएकोमा संस्थाले सम्मान पत्र र नगद सहित सम्मान गरेको हो । यस्तै संस्थाले उत्कृष्ट बचत कर्ता ३ जना, अपाङ्ग २ जना र उत्कृष्ट ऋणी २९ जनालाई पनि सम्मान गरेको छ ।

सहकारीमा उत्कृष्ट वचकर्ताहरु गिर्मी बज्राचार्य, शुक्रराज बराइली र पदम श्रेष्ठ लाई दोसल्ला र सम्मान पत्र सहित सम्मान गरिएको छ । यसका साथै अपाङ्गता भएका गेहेन्द्र राई र विपना मगरलाई १ हजार रुपैयाँको साथमा सम्मान पत्र सहित सम्मानित गरिएको छ ।  साधारणसभाको प्रमुख आतिथ्यता सोलुदुधकुण्ड नगरपालिकाका योजना शाखा प्रमुख रामकुमार खड्काको रहेको थियो । कार्यक्रममा संस्थाका संस्थापक ओम बहादुर कार्की लगायतको उपस्थिति रहेको थियो ।