सोताङमा तीन महिने एडभान्स सिलाई कटाई तालिम सम्पन्न

असार ८, सोलुखुम्बु । सोलुखुम्बुको सोताङ गाउँपालिकामा तीन महिने एडभान्स सिलाई कटाई तालिम आइतबार सम्पन्न भएको छ । महिलाहरुको सशक्तीकरण र स्वरोजगारमा प्रोत्साहन गर्ने उद्देश्यले आयोजित तालिम सोताङ गाउँपालिकाको महिला शाखाको आयोजनामा सम्पन्न भएको हो । १३ जना महिलाहरूले सहभागिता रहेको तालिमको राधिका नेपालीले सहजिकरण गर्नुभएको सहकर्मी मनोज तामाङले जानकारी दिनुभयो ।

तालिम अवधिभर सहभागी महिलाहरूले एडभान्स स्तरका सिलाई सीप सिक्दै, आत्मनिर्भर बन्ने तथा भविष्यमा व्यवसायिक रूपमा अगाडि बढ्न सक्ने क्षमता विकास गरेका छन् । तालिम समापन कार्यक्रम वडा नं ५ स्थित सभा हलमा आयोजना गरिएको थियो । कार्यक्रममा सोताङ गाउँपालिकाका अध्यक्ष खिलराज बस्नेत प्रमुख अतिथि रहनुभएको थियो भने उपाध्यक्ष अन्जु नाछिरिङ राईको अध्यक्षतामा कार्यक्रम सञ्चालन गरिएको थियो ।

कार्यक्रममा महिला तथा बालबालिका शाखा प्रमुख रिता बस्नेतले तालिमको उद्देश्य तथा उपलब्धिहरू प्रस्तुत गर्दै महिलाहरूलाई सीपमार्फत आर्थिक रूपले सक्षम बनाउन यस्ता तालिमहरू आवश्यक रहेको धारणा राख्नुभयो । समापन कार्यक्रममा सहभागीहरूलाई प्रमाणपत्र वितरण गरिएको थियो भने तालिमको निरन्तरताका लागि आगामी दिनहरूमा थप योजना ल्याइने जानकारी पनि दिइएको थियो ।