उपाध्यक्ष राईलाई माओवादी केन्द्र नेचासल्यानद्वारा गाउँपालिकाको नीति तथा कार्यक्रममा लिखित सुझाव पेश

असार ८, सोलुखुम्बु । नेचासल्यान गाउँपालिकाको आगामी आर्थिक वर्ष २०८२/०८३ का लागि तयार पारिने नीति तथा कार्यक्रम तथा बजेटमा समावेश गर्नुपर्ने विभिन्न सुझावहरू नेकपा माओवादी केन्द्र नेचासल्यान गाउँपालिका कमिटीले लिखित रूपमा पेश गरेको छ । उक्त सुझावहरू उपाध्यक्ष विना राई समक्ष औपचारिक रूपमा पेश गरिएको हो ।

पार्टी अध्यक्ष वियस राईका अनुसार गाउँपालिकाको समग्र विकास, जनजीविकामा सुधार, पूर्वाधार निर्माण र जनसरोकारका विषयलाई प्राथमिकता दिँदै नीति तथा कार्यक्रम बनाइनुपर्ने माग गरिएको छ । सुझावमा गौरव बहुप्राविधिक शिक्षालय सञ्चालन, पिउने पानीको व्यवस्था, सडक स्तरीकरण, पर्यटकीय स्थलसम्म घुम्ती सडक निर्माण, सिचाइ आयोजना, सामुदायिक भवन, सहिद स्मृति पार्क निर्माण, स्वास्थ्य सेवा विस्तार, विद्युत सुविधा, कृषि तथा लिफ्टिङ खानेपानी आयोजना, आर्यघाट व्यवस्थापन, खेलकुद प्रवद्र्धन, कर संकलन तथा बजेट विनियोजन लगायतका विषयहरू उल्लेख छन् ।

गाउँसभाबाट पारित हुने नीति तथा कार्यक्रमले सबै वडाहरूको समावेशी विकास सुनिश्चित गर्नुपर्नेमा जोड दिँदै माओवादी केन्द्रले योजनाहरूमा स्थानीय आवश्यकताको प्रतिबिम्ब पर्ने गरी कार्यान्वयन हुनुपर्ने माग राखेको छ । गाउँ पार्टी अध्यक्ष वियस राई, सचीव बम प्रसाद बास्तोला र प्रदेश कमिटी सदस्य जनरिषी राइले लिखित सुझाव पेश गर्नुभएको सहकर्मी सोभित ढुंगेलले जानकारी दिनुभयो ।