लिम्चुङ्बुङ गाउँपालिकामा रिक्त प्रमुख पदमा सन्देश राईले सम्हाले जिम्मेवारी

असार ८, सोलुखुम्बु । उदयपुरको लिम्चुङ्बुङ गाउँपालिकामा लामो समयदेखि रिक्त रहेको प्रमुख प्रशासकीय अधिकृतको पदमा सन्देश राई नियुक्त भई कार्यभार सम्हाल्नुभएको छ । उहाँलाई आज गाउँपालिकाले एक भव्य स्वागत कार्यक्रमका साथ स्वागत गरेको छ । यसअघि गाउँपालिकाका प्रमुख प्रशासकीय अधिकृत रहेका ताराकिरण राई नबौँ तहमा सिफारिस भई बागमती प्रदेश सरकार अन्तर्गत हेटौंडास्थित मुख्यमन्त्री तथा मन्त्रिपरिषद्को कार्यालयमा सरुवा हुनुभएको थियो ।

उहाँको सरुवापछि गाउँपालिकाको प्रमुख पद रिक्त रहँदा प्रशासनिक कार्यसञ्चालन र आर्थिक कार्यक्रम कार्यान्वयनमा समस्या देखा परेको थियो । गाउँपालिकाले आर्थिक वर्षको अन्त्यमा कार्यालय प्रमुख नहुनुका कारण योजनाहरूको भुक्तानी तथा कार्यक्रमहरू कार्यान्वयनमा ढिलाइ हुन सक्ने भन्दै प्रमुख प्रशासकीय अधिकृतको व्यवस्थापनलाई प्राथमिकता दिएको उदयपुरबाट मिलन परियारले जानकारी दिनुभयो ।

नवनियुक्त प्रमुख प्रशासकीय अधिकृत सन्देश राईलाई स्वागत गर्दै पालिकाका जनप्रतिनिधि, कर्मचारी तथा स्थानीयवासीहरूले आगामी दिनमा उहाँको नेतृत्वमा पालिका प्रशासन अझ प्रभावकारी रूपमा अघि बढ्ने आशा व्यक्त गरेका छन् ।