सोलुदुधकुण्ड–४ फाप्लुमा सञ्चालन भएको मोबाइल मर्मत तालिम प्रभावकारी

असार ८, सोलुखुम्बु । सोलुखुम्बुको सोलुदुधकुण्ड नगरपालिका वडा नं. ४ फाप्लुमा सञ्चालन गरिएको तीन महिने मोबाइल मर्मत तालिम आइतबार सम्पन्न भएको छ । गत चैत्र ७ गतेदेखि सुरु गरिएको तालिमको समापन कार्यक्रममा सहभागीहरुले तालिम प्रभावकारी रहेको प्रतिक्रिया दिएका छन् । व्यावसायिक तथा सिप विकास तालिम केन्द्र, ओखलढुंगा र वडा कार्यालयको संयुक्त आयोजनामा तालिम निःशुल्क रुपमा सञ्चालन गरिएको थियो । तालिममा सहभागी १० जना युवाहरुले सक्रियतापूर्वक सहभागिता जनाएका थिए भने तालिमको सहजीकरण खुरहरि अधिकारीले गर्नुभएको थियो ।

समापन कार्यक्रममा बोल्दै सोलुदुधकुण्ड नगरपालिकाका मेयर नाम्गेल जाङ्बु शेर्पाले युवाहरुलाई स्वरोजगारमुखी बनाउन नगरपालिकाले विभिन्न सिपमूलक तालिमहरु प्रदान गर्दै आएको उल्लेख गर्नुभयो । उहाँले योजना तथा नीतिहरु निर्माणको चरणमा रहेको बताउँदै युवाहरुले सक्रियता देखाएमा आगामी आर्थिक वर्षमा थप तालिम समावेश गरिने प्रतिबद्धता व्यक्त गर्नुभयो ।

त्यसैगरी, वडा अध्यक्ष युवास तामाङले तालिम दिने मामलामा आफ्नो वडा अगाडि रहेको दाबी गर्दै सिकेका सिपलाई व्यवहारमा कम्तीमा ५० प्रतिशत लागु गर्न सहभागीहरुलाई आग्रह गर्नुभयो । प्रमाणपत्र मात्रै सजाएर राख्ने नभई तालिमबाट प्राप्त सीप र ज्ञानलाई व्यवहारमा उतार्न सकेमा मात्र यसको सार्थकता हुने बताउनुभयो ।

व्यावसायिक तथा सिप विकास तालिम केन्द्र, ओखलढुंगाका लेखा अधिकृत बालकृष्ण श्रेष्ठले केन्द्रले सोलुखुम्बु, ओखलढुंगा र खोटाङ जिल्लामा विभिन्न सिपमूलक तालिम सञ्चालन गर्दै आएको जानकारी दिनुभयो । उहाँले यस्ता तालिमबाट धेरै युवा व्यवसायिक बन्दै गएको उल्लेख गर्नुभयो । सहभागीहरुले तालिमको माध्यमबाट व्यवहारिक ज्ञान प्राप्त भएको र आगामी दिनमा आफूहरु स्वरोजगार बन्ने विश्वास व्यक्त गरेका छन् ।