करिब २५ टन प्लास्टिकजन्य फोहोर सुनकोसी नदीमा चुहावट हुनबाट रोकियो

जेठ १९ सोलुखुम्बु । क्याप परियोजना अन्तर्गत क्रिएशन नेपालले गोलन्जोर गाउँपालिकासँग मिलेर करिब २५ टन बराबरको प्लास्टिकजन्य फोहोर मैला सङ्कलन गरी सुनकोसी नदीमा चुहावट हुनबाट रोकेका छन् । शुक्रवार गोलन्जोर गाँउपालिकाको खुर्कोट –७ नदीको किनारमा विगत लामो समय देखि फोहोर डम्पिङ साइटको रूपमा परिणत भएको हटस्पटबाट उक्त परिणामको प्लास्टिकजन्य फोहोर मैला संकलन गरी सफा गरेका छन् ।

क्याप परियोजना अन्तर्गत आयोजना गरिएको नदी सरसफाइ अभियान परियोजना ले परिचालन गरेको युवा स्वयं सेवक (यूथ कोहर्ट), सशस्त्र प्रहरी बल, नेपाल प्रहरी, ट्राफिक प्रहरी, स्थानीय सरोकारवालासँगको सहकार्यमा करिब सय भन्दा बढी सहभागीहरूले सरसफाइ अभियानमा सहभागिता जनाएका थिए ।

‘क्याप परियोजना’ नेपालमा प्लिज (प्लास्टिक फ्री रिभर्स एन्ड सीज अफ साउथ एशिया) को एक प्रमुख आयोजनाको रूपमा रहेको छ भने, यूनोप्स र विश्व बैंकको सहयोगमा दक्षिण एसिया सहकारी वातावरण कार्यक्रम (साकेप) द्वारा लागु गरिएको हो । सरसफाइ अभियानमा प्रमुख अतिथिको रूपमा सहभागी भएका गोलान्जोर गाउँपालिका अध्यक्ष शंकर बराललले पालिकाले गर्नु पर्ने काम क्रिएशनले गरेर हामीलाई राम्रो काम गर्न मद्दत गरिरहेको बताउनुभयो ।

उहाँले बढ्दो सहरीकरणले गोलन्जोर गाउँपालिकालाई पोहोर मैलाको समस्या दिन प्रतिदिन विकराल बन्दै गएको छ चिन्दा व्यक्त गर्दै क्रिएसन नेपालले सञ्चालन गरेको सरसफाइ अभियान र फोहोर मैला व्यवस्थापन गर्ने काम प्रति पूर्ण प्रतिबद्धता रहेको बताउनुभयो ।