भेटेरिनरी अस्पताल तथा पशु सेवा विज्ञ केन्द्र सोलुले किसानलाई उन्नत जातका घाँस वितरण गर्दै

असार २४, सोलुखुम्बु । भेटेरिनरी अस्पताल तथा पशु सेवा विज्ञ केन्द्र सोलुखुम्बुले जिल्लाका किसानलाई उन्नत जातको नेपियर घाँस वितरण गर्ने भएको छ । जिल्लाको सोलुदुधकुण्ड नगरपालिका र सोताङ गाउँपालिकाका किसानहरुले गरेको मागका आधारमा घाँस वितरण गरिने जनाइएको छ ।

केन्द्रका प्रमुख भिमलाल तामाङका अनुसार, थुलुङ दुधकोशीबाट ल्याइएको १० हजार सेट नेपियर घाँस किसानहरूलाई वितरण गरिनेछ । यसले पशुपालन व्यवसायमा लागेका किसानलाई पोषणयुक्त तथा उत्पादनशील घाँस उपलब्ध गराई पशुको दाना खर्च घटाउनुका साथै दूध उत्पादनमा वृद्धि हुने अपेक्षा गरिएको छ । घाँस वितरण कार्यले स्थानीय पशुपालन प्रणालीमा सुधार ल्याउने छ ।

प्रमुख तामाङले कृषकको आम्दानी वृद्धि र दिगो पशुपालन प्रणाली विकास गर्न हामी निरन्तर काम गरिरहेको बताउनुभएको छ । संगठितरूपमा उन्नत जातका घाँसको वितरणले पशुपालन व्यवसायलाई व्यावसायिक रूप दिन सहयोग पुग्ने विश्वास किसानहरूले व्यक्त गरेका छन् ।