खोटाङ जिल्ला पूर्ण खोप सुनिश्चितता तथा दिगोपना घोषित

असार २४, सोलुखुम्बु । खोटाङ जिल्ला ूपूर्ण खोप सुनिश्चितता तथा दिगोपनाू घोषित भएको छ। जिल्लाका दुई नगरपालिका र आठ गाउँपालिकाले पूर्ण खोप सुनिश्चितता तथा दिगोपना घोषणा गरेपछि समग्र जिल्लालाई यो महत्वपूर्ण उपलब्धिमा पुर्‍याइएको हो । कोशी प्रदेशका स्वास्थ्य तथा भौतिक पूर्वाधार विकासमन्त्री भुपेन्द्र राईले असार २२ गते एक विशेष समारोहबीच जिल्लालाई पूर्ण खोप सुनिश्चितता तथा दिगोपना घोषणा गर्नुभयो।

स्वास्थ्य कार्यालय खोटाङका अनुसार चालु आर्थिक वर्ष २०८१,८२ मा जन्मेदेखि १५ महिनासम्मका २,५५७ जना बालबालिका, घरधुरी सर्वेक्षणमा भेटिएका १६ देखि ५९ महिनासम्मका ७,५८२ जना बालबालिका र खोप छुट भएका थप पाँचजना बालबालिकालाई सम्पूर्ण खोप प्रदान गरिएको छ। स्वास्थ्य कार्यालय प्रमुख जीवन चौलागाँइले जिल्लाको खोप कार्यक्रमको समग्र प्रगति सन्तोषजनक रहेको बताउनुभयो । कार्यक्रमको अवसरमा खोप अभियानमा उल्लेखनीय योगदान दिने जिल्ला भरिका उत्कृष्ट १० महिला स्वयंसेविकालाई जनही १२ हजार रुपैयाँसहित सम्मान गरिएको छ।

सम्मानित महिला स्वयंसेविका :

रमा थापा – केपिलासगढी गाउँपालिका

तारा श्रेष्ठ राजभण्डारी – ऐसेलुखर्क गाउँपालिका

भोज कुमारी घिमिरे – रावाबेंशी गाउँपालिका

अमृता राई – हलेसी तुवाचुङ नगरपालिका

बिसुकला राई – दिक्तेल रुपाकोट मझुवागढी नगरपालिका

जमुना राई – साकेला गाउँपालिका

नैन कुमारी राई – दिप्रुङ चुईचुम्मा गाउँपालिका

कृष्ण कुमारी राई – खोटेहाङ गाउँपालिका

जित कुमारी खत्री – जन्तेढुंगा गाउँपालिका

अर्चना मगर – बराहपोखरी गाउँपालिका

त्यसैगरी, सबै स्थानीय तहका स्वास्थ्य शाखाहरूलाई पनि सम्मानपत्र प्रदान गरेर सम्मान गरिएको छ। उल्लेखनीय छ, रावाबेंशी गाउँपालिकाले सबैभन्दा पहिले बैशाख १७ गते पूर्ण खोप सुनिश्चितता तथा दिगोपना घोषणा गरेर प्रदेशमै उदाहरणीय पहल गरेको थियो।