नेचासल्यान गाउँपालिकामा हेभि गाडी संचालनमा रोक

असार २४, सोलुखुम्बु । सोलुखुम्बुको नेचासल्यान गाउँपालिकाले असार महिनाको अविरल वर्षाका कारण सडकहरु कमजोर भएकाले हेभि गाडीहरुको संचालनमा रोक लगाउने निर्णय गरेको छ । गाउँपालिका अध्यक्ष धनजन राईद्वारा हस्ताक्षरित सूचनामा उल्लेख गरिएअनुसार असार २४ गतेदेखि अर्को सूचना प्रकाशित नभएसम्मका लागि गाउँपालिकाभित्र पर्ने सबै सडकहरुमा ६ चक्के वा सो भन्दा ठूला क्षमताका सवारीसाधनहरु सञ्चालन गर्न नपाइने उल्लेख गरिएको छ ।

सूचनामा भनिएको छ, “हाल बर्षादका कारण सडक कमजोर भएकाले यात्रुवाहक र अन्य सवारीसाधन संचालनमा बाधा उत्पन्न हुने समस्यालाई मध्यनजर गर्दै असार २४ गते देखि अर्को सूचना नआए सम्मका लागि नेचा गैरी सडक लगायत पालिकाका क्षेत्रभित्रका सबै सडकहरुमा ६ चक्के र सो भन्दा बढी क्षमताका हेभी गाडीहरु संचालनमा रोक लगाइएको जनाइएको छ ।”

प्रमुख रुपमा नेचा गैरी सडक र त्यससँग सम्बन्धित अन्य आन्तरिक सडकहरुमा यो निर्णय लागू हुनेछ । पालिकाले सर्वसाधारण, यातायात व्यवसायी र सरोकारवाला निकायलाई सूचित गर्दै उक्त निर्देशन पालना गर्न अनुरोध गरेको छ । स्थानिय निकायले मौसममा सुधार आएपछि अवस्था मूल्यांकन गरी आवश्यक निर्णय लिने जनाएको छ ।