लिम्म्चुङ्बुङ गाउँपालिका–५ ले गर्यो उत्कृष्ट विद्यार्थी र शिक्षकलाई सम्मान

असार २४, सोलुखुम्बु । उदयपुरको लिम्म्चुङ्बुङ गाउँपालिका–५, जाँतेले आज एक विशेष सम्मान कार्यक्रमको आयोजना गरी २०८१ सालको एसईई परीक्षामा उत्कृष्ट प्रदर्शन गर्ने विद्यार्थीहरू र शिक्षकलाई सम्मान गरेको छ । विद्यालयबाट २५ जना विद्यार्थी एसईई परीक्षामा सहभागी भएका थिए, जसमा १८ जना उत्तीर्ण भएका छन्। तीमध्ये उत्कृष्ट नतिजा ल्याउने तीन जना विद्यार्थीहरूलाई विशेष पुरस्कारका साथ सम्मान गरिएको हो ।

सम्मान कार्यक्रममा उत्कृष्ट स्थान हासिल गरेका तीन विद्यार्थीहरूलाई विशेष पुरस्कार प्रदान गरिएको हो । कार्यक्रममा प्रथम भएकी शर्मिला बि.क लाई सम्मानपत्र, खादा र नगद ५ हजार, द्वितीय ब्रजेस खड्कालाई ३ हजार र तृतीय शान्ता कार्कीलाई २ हजार सहित वडा अध्यक्ष कबिचन्द्र राईले सम्मान गर्नुभयो । त्यसै गरी, विद्यालयका प्रधानाध्यापक काली प्रसाद चौधरीलाई पनि शिक्षा क्षेत्रमा पु¥याएको योगदानको कदर गर्दै दोसल्ला र प्रशंसा पत्र प्रदान गरिएको उदयपुरबाट मिलन परियारले जानकारी दिनुभयो ।

कार्यक्रममा बोल्दै वडा अध्यक्ष राईले शिक्षक बिना शैक्षिक गुणस्तरको सुधार सम्भव नभएको भन्दै शिक्षकलाई गाली होइन, सम्मान र प्रोत्साहन आवश्यक रहेको धारणा राख्नुभयो । उहाँले विद्यालय र शिक्षकहरूकै समर्पणका कारण यस वर्षको नतिजा उल्लेखनीय बनेकोमा खुशी व्यक्त गर्नुभयो । यस्तै प्रधानाध्यापक चौधरीले पनि यो सम्मान कार्यक्रम विद्यार्थी र शिक्षक दुवैका लागि प्रेरणाको स्रोत बनेको उल्लेख गर्दै वडा कार्यालय र पालिकाप्रति आभार व्यक्त गर्नुभयो । कार्यक्रममा शिक्षा शाखा प्रमुख गोबिन्द कार्कीले गत वर्षको शून्य परिणामबाट सिक्दै यसपालि ७० प्रतिशत विद्यार्थी उत्तीर्ण गराउन सफल भएकोमा विद्यालय र शिक्षकहरूलाई धन्यवाद दिनुभयो ।

उहाँले शिक्षाको माध्यमबाट मात्र वैदेशिक रोजगारीमा जानु परे पनि सम्मानजनक जीवनयापन सम्भव हुने उल्लेख गर्दै, सीपमूलक शिक्षा प्रणालीको आवश्यकता औंल्याउनुभयो । कार्यक्रममा स्थानीय जनप्रतिनिधि, शिक्षक, अभिभावक, विद्यार्थी, राजनीतिक दलका प्रतिनिधि गरी करिब २०० जनाको उपस्थिति रहेको थियो । कार्यक्रम शिक्षा शाखा प्रमुख गोबिन्द कार्कीको प्रमुख आतिथ्यता र वडा अध्यक्ष कबिचन्द्र राईको सभापतित्वमा सम्पन्न भएको हो ।