असार २५, सोलुखुम्बु । सोलुखुम्बुको सोलुदुधकुण्ड नगरपालिकाले नगरक्षेत्रभित्र प्लास्टिक झोलाको प्रयोग, बिक्री तथा वितरणमा पूर्ण प्रतिबन्ध लागू गरेको छ । वातावरण संरक्षण र फोहरमैला व्यवस्थापनलाई प्राथमिकता दिँदै २५ गते नगर प्रहरीले गस्तीका क्रममा प्रतिबन्धित प्लास्टिक झोला प्रयोग गरिरहेका केही पसलहरूमा छापा मारी झोला जफत गरेको र सम्बन्धित व्यवसायीलाई चेतावनी दिइएको छ ।
नगर प्रहरी ङवाङ ठिन्ले शेर्पाका अनुसार नगरपालिकाले वातावरणमैत्री बजार निर्माण गर्न प्लास्टिक झोला पूर्णरूपमा निषेध गरिएको छ । यस अभियानमा सबै उपभोक्ता र व्यवसायीहरूको सहकार्य आवश्यक रहेको उहाँले बताउनुभयो । नगरपालिकाले सबैलाई बायोडिग्रेडेबल झोला वा अन्य पुनः प्रयोग गर्न मिल्ने वातावरणमैत्री विकल्पहरू अपनाउन आग्रह गरेको छ ।
फोहर व्यवस्थापनलाई व्यवस्थित बनाउन नगरपालिकाले ‘आधारभूत सरसफाइ तथा फोहरमैला व्यवस्थापन ऐन, २०७५’ को कडाइका साथ कार्यान्वयन सुरू गरेको जनाएको छ । ऐनअनुसार नियम उल्लंघन गर्नेहरूमाथि पहिलोपटक २५ हजार र दोहोरिएमा ५० हजार सम्म जरिवाना लाग्ने व्यवस्था रहेको छ ।
Discussion about this post