अबको बर्षाले धान रोपाइँमा तीव्रता आउने अपेक्षा : सोलुखुम्बुमा ढिलो वर्षाले बनायो असर

असार २६, सोलुखुम्बु । हिमाली जिल्ला सोलुखुम्बुमा ढिलो वर्षाले धान खेतीमा प्रत्यक्ष प्रभाव पारेको छ । असार २२ गतेसम्म जिल्लाभर जम्मा २६.९३ प्रतिशत मात्र धान रोपाइँ सम्पन्न भएको कृषि ज्ञान केन्द्र सोलुखुम्बुका कृषि सूचना अधिकारी महेश शर्माले जानकारी दिनुभएको छ । सामान्यतया असार महिनाभित्र रोपाइँ सम्पन्न गर्ने परम्परा रहेको भए पनि यस वर्षको ढिलो वर्षाले कृषकलाई खेत जोत्न र धान रोप्न कठिनाई भएको हो । सोलुखुम्बुमा धानखेती हुने अनुमानित क्षेत्रफल १ हजार २ सय २५ हेक्टरमध्ये हालसम्म ३३० हेक्टर क्षेत्रफलमा मात्र रोपाइँ सकिएको छ ।

स्थानीय तहअनुसार रोपाइँको प्रगति फरक देखिएको छ । महाकुलुङ गाउँपालिकामा सबैभन्दा बढी ८० प्रतिशत रोपाइँ सम्पन्न भएको छ भने लिखुपिकेमा ४०.७४ प्रतिशत, सोलुदुधकुण्ड नगरपालिकामा ३३ प्रतिशत, माप्य दुधकोशीमा २६.६६ प्रतिशत, थुलुङ दुधकोशी र सोताङमा समानरूपमा २१ प्रतिशत मात्र रोपाइँ भएको छ । नेचासल्यानमा भने रोपाइँको अवस्था झन् कमजोर जम्मा १९ प्रतिशत देखिएको छ ।

यद्यपि केही दिन यता निरन्तर वर्षा भइरहेको हुँदा अब रोपाइँमा तीव्रता आउने अपेक्षा गरिएको छ । जलवायु परिवर्तन र वर्षाको अनियमिततालाई सोलुखुम्बु जस्ता उच्च पहाडी जिल्लाका किसानले बारम्बार भोगिरहेका छन् । हालको अवस्थाबाट संकेत मिल्छ कि सोलुखुम्बुमा कृषि समयमै सम्पन्न गर्न मौसममै निर्भर रहनुपर्ने बाध्यता कायमै छ । यदि आगामी दिनमा मौसमले साथ दियो भने बाँकी धान खेतमा रोपाइँ सम्पन्न हुने आशा कृषि ज्ञान केन्द्रले लिएको छ ।