नेले र काँगेलमा बत्ति नबलेको भन्दै उपभोक्ताको आपत्ति, प्राविधिक सहित अनुगमनमा निस्किने प्रमुख यादवको प्रतिबद्धता

असार २७, सोलुखुम्बु । सोलुखुम्बु जिल्लाको थुलुङ दुधकोशी गाउँपालिका–१ र २ अन्तर्गत नेले र काँगेल क्षेत्रमा लगातार बत्ति नबलेको भन्दै स्थानीय उपभोक्ताहरुले गम्भीर आपत्ति जनाएका छन् । शुक्रबार उपभोक्ताहरु नेपाल विद्युत प्राधिकरण वितरण केन्द्र, सोलुखुम्बुको कार्यालयमै पुगेर आफूहरूले भोगिरहेको समस्याबारे जानकारी गराउँदै तत्काल समाधानको माग गरेका हुन् ।

उपभोक्ताहरूका अनुसार केही ठाउँमा बत्ति बलिरहेको छ भने केही स्थानमा निरन्तर अन्धकार छ, जसले जनजीवन प्रभावित भएको छ । बारम्बार जानकारी गरे पनि प्राधिकरणले बेवास्ता गर्दै आएको भन्दै उनीहरूले असन्तुष्टि व्यक्त गरेका छन् । यसबाहेक, उपभोक्ताहरूले जथाभावी पोल गाडिएको, तारहरू अनियमित रूपमा लत्रिएको जस्ता समस्या पनि औंल्याएका छन् ।

यस्तो प्राविधिक लापरबाहीका कारण दुर्घटनाको जोखिमसमेत बढ्ने उनीहरूको भनाइ छ । उपभोक्ताको गुनासो सुनेपछि नेपाल विद्युत प्राधिकरण वितरण केन्द्र, सोलुखुम्बुका प्रमुख अशेश्‍वर कुमार यादवले गम्भीरता पूर्वक लिनुभएको छ । उहाँले शनिबार बिहान ८ बजे प्राविधिक टोलीसहित स्वयम् नेले र काँगेल क्षेत्रको अनुगमनमा निस्कने र समस्या समाधानका लागि आवश्यक सबै कदम चालिने प्रतिबद्धता जनाउनुभएको छ ।

स्थानीय बासिन्दाले विद्युत सेवा सहज र नियमित बनाउन आग्रह गरेका छन् । अब प्राधिकरणको टोलीको अनुगमनपछि समस्या समाधान हुनेमा उपभोक्ताहरू आशावादी देखिएका छन् ।