चन्द्र ज्योति मावि भकाञ्जेले गर्यो शिक्षक तथा एसईई उतिर्ण विद्यार्थीलाई सम्मान

असार २७, सोलुखुम्बु । सोलुखुम्बुको लिखुपिके गाउँपालिकामा अवस्थित चन्द्र ज्योति माध्यमिक विद्यालयले शतप्रतिशत एसईई (माध्यमिक शिक्षा परीक्षा) उत्र्तीर्ण गरेका विद्यार्थीहरूलाई एक विशेष समारोहका बीच सम्मान गरेको छ । विद्यालयले २०८१ सालमा एसईईमा सहभागी भएका २४ मध्ये सबै २४ जना विद्यार्थीलाई सफल बनाउँदै लगातार तेस्रो वर्ष पनि शतप्रतिशत नतिजा कायम राख्न सफल भएको हो ।

सम्मान कार्यक्रममा उत्कृष्ट नतिजा ल्याउने छात्रा ङिम ल्हाकि शेर्पालाई विद्यालय प्रथम घोषित गर्दै विशेष सम्मान गरिएको थियो । उनले ३.५१ जीपीए प्राप्त गरेकी हुन् । उक्त कार्यक्रममा विद्यालयका विषयगत शिक्षकहरूलाई समेत प्रशंसापत्रद्वारा सम्मान गरिएको छ । शिक्षकहरूको योगदानको कदर गर्दै लिखुपिके गाउँपालिका–५ को वडा कार्यालयले सम्पूर्ण शिक्षकहरूलाई प्रशंसा पत्र प्रदान गरेको हो ।

कार्यक्रममा विद्यालयका प्रधानाध्यापक, शिक्षक, अभिभावक, वडा प्रतिनिधि तथा विद्यार्थीहरू सहभागी थिए । कार्यक्रममा विद्यालयले निरन्तर उत्कृष्ट नतिजा हासिल गर्दै आइरहेकोमा गर्व व्यक्त गरिएको थियो । स्थानीय शिक्षाको उन्नयनमा उल्लेखनीय योगदान दिँदै आएको चन्द्र ज्योति माध्यमिक विद्यालयले आगामी वर्षहरूमा अझ प्रभावकारी शिक्षण–शिक्षण प्रक्रिया अघि बढाउने प्रतिबद्धता जनाएको छ ।