ऐसेलुखर्क गाउँपालिकाको नयाँ प्रशासनिक भवन उद्घाटन, भ्रष्टाचार र कानुनी लडाइपछिको सफलता

असार २७, सोलुखुम्बु । खोटाङको ऐसेलुखर्क गाउँपालिकामा नवनिर्मित प्रशासनिक भवनको उद्घाटन गरिएको छ । शुक्रबार एक समारोहका बीच गाउँपालिका अध्यक्ष गिरेन्द्र बहादुर राई र उपाध्यक्ष राजेश कुमार राजभण्डारीले संयुक्त रूपमा उक्त भवन उद्घाटन गर्नुभएको हो । २ करोड ३० लाख रुपैयाँको लागतमा ९ रोपनी ४ आना क्षेत्रफलमा फैलिएको १० कोठे दुईतले भवन निर्माण गरिएको हो ।

अध्यक्ष राईका अनुसार प्रारम्भिक योजना अनुसार तीन तले बनाउने भनिए पनि प्राविधिक समस्या र कानुनी अड्चनका कारण दुई तले बनाइएको हो । “अन्यत्र उपयुक्त जग्गा नपाएकाले यही भवनलाई परिमार्जन गर्दै सम्पन्न गरिएको हो,” अध्यक्ष राईले बताउनुभयो । यस भवनको निर्माण क्रममा ’नक्कली’ ल्याब रिपोर्ट प्रकरणले ठूलो विवाद निम्त्याएको थियो। भवन निर्माणको प्रारम्भिक चरणमै—२०७८ साल जेठदेखि—ग्राउण्ड फ्लोरको पिलरको ल्याब परीक्षणमा असफल भएको पाइएको थियो । तर निर्माण कम्पनी रुजन–जगदम्बा–भुवनेश्वरी एण्ड वैभव जेभी, नयाँ बानेश्वर काठमाडौंले त्यही असफल रिपोर्टलाई पास देखाएर ‘किर्ते’ ल्याब रिपोर्ट पेश गरेको खुलेको थियो । यस प्रकरणपछि निर्माण कार्य तत्कालिन गाउँपालिका अध्यक्ष विश्वनाथ निरौलाको कार्यकालमा ठप्प भएको थियो ।

सार्वजनिक खरिद ऐन २०६३ अनुसार ठेक्का रद्द गर्नेदेखि धरौटी जफत गर्ने निर्णय गरिएको थियो । निर्माण कम्पनी अदालत पुगे पनि उच्च अदालत पाटनले उनीहरूलाई परेको अल्पकालीन अन्तरिम आदेश खारेज गरिदिएको थियो । नेपाल मध्यस्थता परिषद (नेप्का)को सहजीकरणमा उत्पन्न विवाद समाधानपछि मध्यस्थ ऐन, २०५५ अन्तर्गत पुनः काम अघि बढाइएको हो । नयाँ भवन सञ्चालनमा आएपछि विगत मासिक घरबहाल कर सहित ३९ हजार रुपैयाँ भाडा तिरेर सेवा दिँदै आएको गाउँपालिकाले अब आफ्नै भवनबाट सेवा प्रवाह सुरु गरेको छ ।